WILLEMSTAD.-E kompania anónimo di gobièrnu Refineria di Kòrsou (RdK) a anunsiá porfin kua ta e partido/kompania ku lo sigui negoshá kuné pa bira operadó i manehá e refineria na Kòrsou. Manera EXTRA a informa den kurso di e último siman di aña, gerensia di RdK i PMO a evaluá e kandidatonan i despues a bai Konseho di Minister. Awe Konseho di Minister a bolbe trata e asuntu, manera premier Rhuggenaath mes a deklará.

RdK ta bisa ku dia 2 di Yanüari e órganonan statutario di RdK a bai di akuerdo ku e rekomendashonnan di Gerensia di RdK. Tambe Konseho di Minister a rekonfirmá e desishon ku a keda aprobá pa e órganonan statutario di RdK, konforme e statutonan vigente. Manera EXTRA a indiká anteriormente, e kompania selektá pa sigui negoshá kuné ta Curaçao Oil Refinery Complex B.V. (CORC B.V.).

Awor lo bai start e fase di negosiashon pa yega na un kontrato di maneho i un modelo di partisipashon entre RdK i e partido menshoná. Na mes momentu e partido aki lo bai negoshá ku Gobièrnu di Kòrsou un kontrato ku lo kubri e kondishon pa maneho i operashon di e fasilidatnan petrolero na Kòrsou. Mas detaye den edishon di EXTRA.