WILLMSTAD.- Korte di promé instansia ayera a trata kaso di e hòmber Bonifacio Roosje ( 64) mihó konosí komo Junni.

Roosje ta keda akusá di a choka e dama venezolano  Niloa Teresa Delgado Castillo di 47 aña mata dia 12 di mart último den kaya Silantro.

Segun e akusashon, Roosje a choka e dama, strangul’é den kombinashon ku hork’é, tapando su boka i nanishi ku e konsekuensia ku e dama a stek muri.

Segun e rapòrt di outopsia, a haña hopi sanger den e tóraks di e dama. Esei a wòrdu kousá dor di e slanan ku e dama a haña. Riba su kolchon tabatin un kantidat di sanger i tambe sanger tabata basha fo’i su boka. Segun e investigashon, a haña rastro di dede di Roosje na 6 parti stratégiko di kurpa di e víktima. Tambe a haña rastonan di dede na 2 parti di kurpa di e víktima di e hòmber di fam Koeiman ku  tabata biba ku e dama na kas di un hòmber paralítiko kual ámbos tabata kuida.  .

Aparentemente e dama tabatin un relashon ku Koeiman i tambe ku e akusado.

Banda di e kolchon, polis a haña un bòter di binager habrí kual a haña un tiki di e líkido den boka di e víktima Pero no a hañ’é den su kurpa.  Polis ta pensa ku esaki tabata e strategia pa laga kere ku e dama  bebe binager pa mata su kurpa.

Segun e prosèsverbal di polis, a haña rastro di Roosje su dede riba  dòpi di e bòter di binager i riba e bòter  di binager a haña man di Koeiman.

Polis a deskubrí ku e chip di e telefòn di e víktima a resultá den telefòn di Roosje.

Roosje a splika ku un dia e tabata kushiná i un pikòp blanku a bin pita na su kas. Un hòmber deskonosí a bin serka dje pa e yud’é ku su outo, el a bai pafó serka e hòmber i a laga su telefòn riba mashin di un vehíkulo  ku tabata para den su kurá. Ora el a sinti ku su sòpi tabata kimando riba stof, el a bisa e hòmber ku e ta bai paden pa wak su sòpi. Pero ora el a bai pafó bèk, e no a haña e hòmber mas i su telefòn tabata habrí. El a haña e kos straño, pero no a para ketu. Ta despues el a komprondé ku e chip di e víktima tabata hinká den e telefòn.

Roosje a para riba ku e no sa ken ta esun ku a pone e chip den e telefòn. El a splika ku e pikòp ku a presentá na su kas, tabata paresido na esun di e hòmber Koeiman ku e tabatin problema kuné algun tempu pasá.  Hues a bisa ku polisnan no por a haña telefòn di  e dama niun kaminda .

Roosje durante di e kaso a keda grita ku e no tin nada di aber ku e asesinato.

El a grita ku e no por sinta kastigu di otro hende. “ Mi no tin kurason pa mata hende “.

Asta ora ku mata mi bestianan mi ta sinti”, segun e akusado.  Hues a ninga e petishon di e abogado pa posponé detenshon di Rooje, mirando ku e akusashonnan den su kontra ta grave.

E kaso a keda posponé pa dia 24 d mart binidero henter dia. Hues a bisa ku e ke skucha Koeiman e dia ei durante tratamentu di e kaso. Si e no presentá di su mes, polis lo bai busk’e kaminda e ta pa trese “Kas di korte”.