Segun OM e kurá no tabata na òrdu

WILLEMSTAD.- Tin un video ku ta bayendo rònt riba media sosial kaminda agentenan polisnan ta bai kas di un famia i konfiská un kachó.

Doño di e kachó tabata hopi histériko i no tabata ke pa e polisnan bai ku su bestia.  El a asta sera su kurpa den e kouchi di kachó pa nan no bai ku e animal.

Hopi bia ora ku polis bai na un adrès pa konfiská un kachó, ta pasó denunsia a drenta ku e kachó lo a morde hende òf bestia òf pa motibu ku e ta kana lòs i ta forma peliger pa e bario i bisindario.

EXTRA a drenta den kontakto ku Ministerio Públiko ku a konfirmá e informashon.  Segun e fiskal ta asina ku a drenta un denunsia ku e kachó a morde algun otro kachó malamente i laga nan atras tur na sanger. Aparentemente e hèkwèrk di e kas no tabata na òrdu i esei ta pone ku fásilmente e kachó tabata sali i morde e otro kachónan.

Segun Ministerio Públiko esei ta un sospecho te ku ora kaba di hasi algun investigashon.

E kachó no a morde niun  hende pero si ta sospechá ku el a morde otro bestianan, p’esei Ministerio Públiko a usa e lei 3:2 insiso 2 ku ta bisa ku si e kachó ta forma peliger den su bisindario pa motibu ku e hèkwèrk di su kurá no ta na òrdu, e tin ku wòrdu konfiská. P’esei a laga konfiská e kachó riba òrdu di Ministerio Públiko.

Despues di hasi un investigashon i si e doñonan pone nan kurá na òrdu por haña e kachó bèk.

Relashoná ku e video aki mester bisa ku ta basta insulto tambe e persona ku a bai kue e kachó komo e polisnan na e sitio mester a tende na man di e famia. A yama nan tur sorto di kos, palabra malu i asta skupi dirigí pe outoridatnan presente. No tabata falta masha pa e situashon sali for di man, pero mester bisa tambe ku e señora di kas dado momentu a logra ku otro miembro di e famia pa saka e yu for di den kouchi di e kachó, pa asina outoridatnan por a bai ku e animal.

E tipo di situashonnan aki ta basta fèrfelu i p’esei un konseho na tur ku ta stima nan bestia di kas, sòru pa bo kurá ta bon será pa e animal no tin di bira un molèster pa otronan.