WILLEMSTAD.-Aqualectra a tene un seshon di informashon virtual pa prensa den kua a splika e situashon aktual pa loke ta trata koriente. Direktor Darick Jonis a splika ku nan tin vários kolega ku sea a tèst positivo pa Corona vírus òf nan ta den isolashon loke ta pone ku e hendenan aki no por traha. Tin vários otro ku tambe a hasi tèst i pa esei e direktor a yama danki na laboratorionan ku a yuda pa fasilitá e resultadonan mas lihé posibel.

Pa loke ta trata e situashon di koriente mes Jonis a duna di konosé ku nan sierto problema ku mashinnan kaba i awe mainta un mashin den e planta nobo na Dokweg a kai afó debí na un fayo tékniko. No a dura muchu despues ku un otro mashin na Dokweg 2 tambe a kai afó i esei a pone mas preshon riba e ret. Awe mainta 8:20 Aqualectra a registrá ku rònt Kòrsou a keda sin koriente.

Entretantu trabounan a sigui, di tal forma ku gerensia ta kalkulá ku pa mas o ménos 12’or di mèrdia lo por kuminsá duna tantu aeropuerto i hospital koriente bek. Ta trata di dos instituto ku meresé tur prioridat. Pero esei ta si tur kos kana bon. Nan ta pendiente di algun tèst ku mester hasi ainda.

Pa loke ta trata otro partinan di Kòrsou Jonis ta kere ku pa atardi lo ta kla pa duna rònt Kòrsou koriente atrobe.

E situashon ta keda delikado! Banda di ekiponan e reto mas grandi ku Aqualectra mester atendé kuné awor aki ta kapasidat humano, esta trahadó pa realisá e trabounan tan nesesario. A pidi asistensia di e kompania Wärtsila i tambe lo akudí na kontratistanan lokal ku tin e eksperensia pa yuda ku e trabounan.