Skema pago trahadónan ISLA ta dependé di belasting, benta produkto i Girobank

WILLEMSTAD.-Gerensia di Refineria Isla BV a firma un kombenio ku e sindikatonan APRI i PWFC pa loke ta trata un skema di pago ku Isla mester kumpli kuné na su trahadónan. A firma e akuerdo aki dia 22 di yanüari 2020, esta djarason último. Isla ta indiká ku e prome pago ta tuma lugá asina ku keda kla ku un areglo speshal (tax rulling) ku a pidi na inspektor di belasting. Na e momentu ku haña e areglo speshal di belasting ta kumpli ku e prome pago.

Ta bon pa apuntá ku esaki no ta prome akuerdo ku e sindikatonan ta firma ku Isla/PDVSA. Den a kombenio ku a firma djarason último ta spesifiká ku partidonan a yega na e akuerdo ariba menshoná komo resultado di terminashon di e kontrakt di lease entre PDVSA i Refineria di Korsou dia 31 di desèmber 2019. Refineria Isla a yega na un akuerdo mutuo ku su trahadónan pa terminashon di e akuerdo laboral i tambe e plan di redundansia(afvloeiingsplan). Refineria Isla ta enfatisá den e akuerdo ku el a kumpli ku tur su obligashonnan na su empleadonan den 34 aña.

E skema di pago ta indiká ku lo paga e trahadónan den 5 parti. Kada parti lo paga e trahadónan 20% di loke Isla debe nan. Manera indiká ariba e prome pago ta pendiente asina ku haña e areglo speshal di belasting (red.esei ta dependé di gobièrnu i su servisio di impuesto)

Pago di parti 2 i parti 3 ta dependé di e benta di produktonan petrolero ku aktualmente ta den tankinan di Isla. Pago di parti 4 i parti 5 ta dependé pa haña e sènnan ku Isla/PDVSA tin na Girobank. Mas detaye den edishon di EXTRA.