Mester pone un fin na diskriminashon di edat

WILLEMSTAD. - Promé di òktober ta ‘Dia Internashonal di Hende Grandi’, proklamá pa Nashonnan Uní na aña 1990. E tema pa aña 2024 ta: “Ageing with dignity: strengthening care and support systems for older persons” (Bira hende grandi ku dignidat: fortalesé kuido I sistemanan di sosten na nos grandinan). Fundashon Nos Grandinan (FNG), trahando pa 21 aña konsekutivo pa grandinan, ta uní ku komunidatnan mundial pa sigui sostené grandinan realmente.

E tema di e aña aki ta resoná ku e mishon di FNG. Promé ku esaki a bira un tópiko global, FNG a komprometé su mes den e lucha pa mehorá kalidat di bida di nos grandinan ku a bai hopi atras. FNG su kompromiso ta pa sigurá ku grandinan ta sigui krese ku dignidat, risibiendo bon atenshon, rèspèt i apresio di komunidat por lo general.

Un yamada pa dignidat propio i un mihó sistema di sosten pa grandinan.

E tema di e aña di Dia Internashonal di Hende Grandi 2024 ta enfatisá riba e nesesidat urgente pa krea un ambiente kaminda grandinan por biba ku dignidat, sin sinti nan ekskluí, sostené dor di nan propio famia kombiná ku un sistema di kuido robusto. Na nivel mundial tin miónes di grandi ta enfrentá kuido no-adekuá, miéntras ku na Kòrsou, e poblashon di hende grandi ta rekerí mas sosten i kompasivo pa atendé ku nan nesesidat.

‘Bira grandi ku dignidat ta un derecho, no un privilegio,’ Geselle Rosaria – Coffi, presidente di FNG, ta enfatisá. ‘Fundashon Nos Grandinan ta traha duru pa sigurá ku grandinan ta keda balorá, protehá i tambe pa nan risibí servisionan esensial ku nan meresé.’

Konfrontá e fenómeno nobo di diskriminashon di edat, un responsabilidat sosial. E Organisashon Mundial di Salú (WHO) ta definí diskriminashon di edat komo “e stereotipo (kiko nos ta pensa), prehuisio (kiko nos ta sinti) i diskriminashon (kon nos ta aktua) pa ku otro òf ku nos mes basá riba edat.” Geselle Coffi ta splika: “Diskriminashon di edat ta e diskriminashon kontra nos grandinan a bira algu aseptabel den nos komunidat, aunke nos tur sa ku diskriminashon, den kualke forma, ta violá derecho humano i ta den konflikto direkto ku e prinsipio di igualdat.”

Diskriminashon di edat ta un opstákulo ku ta stroba embehesimentu digno. Ageism ta afektá debido atenshon na grandinan, prinsipalmente  pa loke ta trata salú, inklushon sosial i tambe servisio finansiero (básiko), por ehèmpel AOV òf no a logra un sierto fiansa na banko. Fundashon Nos Grandinan ta stimulá komunidat pa reflekshoná e impakto di ageism riba grandinan den tur área di nan bida.

“Komo un sosiedat, nos mester liberá for di e stéreo tiponan aki ku ta disminuí e balor di grandinan,” Coffi ta sigui bisa. “Nos grandinan ta e pilar di nos komunidat i ta nos deber pa sigui gradisí nos grandinan pa nan kontribushon, dor di ekspresá esaki kontinuamente pa yuda kombatí diskriminashon di edat den tur forma.”

Pa realmente kombatí diskriminashon di edat i apoyá nos grandinan realmente den tur sentido di palabra, komunidat den su totalidat tin ku tuma akshon den vários manera. Primeramente, mester promové empatia pa rekonosé i balorá eksperensianan i sabiduria ku grandinan tin pa ofresé na komunidat. Adishonalmente, mester tin esfuerso kompartí pa fortalesé sistemanan di bon kuido: gobièrnu, negoshinan i organisashonnan sivil tin ku traha huntu pa desaroyá inisiativanan ku ta priorisá salú i bienestar general di grandinan. Tambe ta hopi esensial pa boga pa inklushon, manera FNG ta hasi pa 21 aña. Si nos no hasi esaki, den futuro (serkano) tur hende lo bin sufri di ageism.

Fundashon Nos Grandinan ta sigui boga pa komunidat den su totalidat rekonosé e kontribushonnan di grandinan i desafionan ku grandinan ta enfrentá. Hende grandi meresé di keda respetá. E kompromiso aki no solamente ta pa honra e grandinan so, sino tambe ta sirbi komo un motivashon pa futuro generashonnan ku lo bai ta esnan yamá pa kuida di nos mañan ku Dios ke. Huntu, nos por krea un Kòrsou kaminda ‘bira grandi ku dignidat i protekshon’ no ta solamente un lema, si no un realidat!.