E pais aki ku tin lei pa rigi wega di number

WILLEMSTAD.-Minister di finansa den kontestanan na Parlamento a indiká ku ta trahando riba un posibel solushon i ta spera ku den promé mitar di 2024 lo yega einan. Minister Silvania a haña e pregunta kon por ta posibel ku riferonan no por tin un kuenta di banko den e pais aki? Kòrsou tin un lei ku ta regla wega di number, e tin fundashon Wega di Number pa kumpli ku tareanan na nòmber di gobièrnu i asta un Gaming Control Board.

Minister Silvania a bisa ku e gobièrnu aktual ta mira e importansia di un maneho pa yega na inklushon finansiero (financiele inclusie) di un i tur. Nan ta na altura di e problema di e riferonan ku no por habri un kuenta di banko aki na Korsou, esaki ta algu ku pa hopi aña ta asina kaba. Gabinete Pisas ke bin ku un solushon pa e grupo aki. Ya kaba tabatin diferente diskushon ku e mundu finansiero i ku e riferonan mes riba e tópiko aki. Pa di promé ta trahando riba e modernisashon di e lei Loterijverordening 1909, pa hasi esaki mas aktual i pa mehora e parti di supervishon den e sektor aki. Banda di esaki, tin un konsepto di lei kual lo hasi posibel ku gobièrnu ta introdusí un Betaaldienstverlener. E Betaaldienstverlener aki lo hasi posibel pa riferonan por habri un kuenta di banko i hasi nan transakshonnan lokal. E konsepto di lei aki a bai Wjz kaba i tabata tin vários ronda di konsulta ku diferente stakeholders. Ta premirá ku den e promé mitar di e aña aki e lei lo ta kla pa pidi konseho.