WILLEMSTAD.- Ta trahando riba un proyekto piloto pa por habri farándula, pero tambe teater, ta loke ku promé minister demishonario sr. Eugene Rhuggenaath a duna di konosé den parlamento ayera.
Sr. Rhuggenaath a kontestá e pregunta ta dikon no por tene evento den aire liber. Promé minister a kontestá ku e sa ku sektor di evento, artístiko, farándula a keda impaktá durante henter e krísis di COVID-19. Evento musikal ta kaminda ta haña aglomerashon di hende. Teniendo kuenta ku variante ku tabatin, e vírus ta plama muchu mas lihé i konsekuensia ku esaki tabatin pa salú di hende. E enfoke dje medidanan ta pa evitá aglomerashon.
Eventonan musikal, ounke ta den aire liber, esaki ta bai ku bailamentu i kantamentu. Rònt mundu por a mira ku aktividatnan musikal ta eventonan di plamamentu dje vírus. Resientemente den asamblea nashonal ta trahando pa wak kon por habri farándula, kuminsando ku proyektonan piloto. E ora ei por midi ku e protokòlnan ku tin na lugá, ku no tin mas kontagio i asina por sigui habri. Awor aki ta n’e punto pa dal e stap.
Den diferente momentu a trata di distinguí toke de keda den siman i wikènt. Promé minister a bisa meskos ku plachi di dia, ke keda konsistente ku e orario di toke de keda pa no a trese konfushon òf ta pone peso riba komunidat pa keda kòrdá orario di toke de keda.
Paso a paso ta relahá medida, kaba ta wak e resultado i ta sigui habri, i adaptá e orario di toke de keda ku 2 ora.
Mirando unda nos ta, promé minister a bisa ku internamente ta debatí pa alargá toke de keda te 1 or òf hasta eliminá esaki. Loke ta tene kuenta kuné ora ta deliberá, ta e parti di mantenshon di órden di pari Kuerpo Polisial i MEO. Pero mas lat ku bai ku e orario, mas lat lokalidat ta keda habrí, i e komportashon di alkohòl.
Ta diferente kos ku ta balansá, i konseho ku ta haña di Kuerpo Polisial i MEO.
Dikon por habri fasilidat di bai sine i no habri teatro pa bai komedia, sr. Rhuggenaath a kontestá ku di parti di sine tabatin protokòl ku a funshoná hopi bon i no a krea riesgo di kontagio. Den sine tin separashon di stulnan. I tambe e ta un otro tipo di aktividat. Na sine ta sinta wak un pelíkula. Pero ora tin komedia i arte, e komportashon ta otro i tin interakshon entre oudiensia i esun ku ta hasi e obra, tin harimentu. Tin atenshon pa e área aki, ta ekspreshon artístiko, ta parti desaroyo di komunidat i kultura. P’esei den e área aki ta trahando pa bin ku proyekto piloto pa midi i wak kon por habri pa teatro, promé minister Rhuggenaath a indiká.