WILLEMSTAD.- Tantu Pastor Israel komo abitantenan (fielnan Katóliko) di e Bario di Willebrordus ta sumamente preokupá pa e situashon di Misa di Willebrordus. Un monumento históriko ku a keda konstruí entre añanan 1884 / 1889, pues un misa di mas ku 135 aña.

E bario aki ku tabata ser yamá 'Mondi Afó' na 1888 a haña su parokia, I fielnan Katóliko di e área di Bándabou aki a haña un kas kaminda nan por a bai nan enkuentro ku Dios.

Misa di San Willebrordus ta un di monumentonan históriko ku durante di henter aña turistanan ku ta bishitá e área aki sea ta pa bai playa, saka potrèt  den nos naturalesa, wak flamingunan den e saliña etc. Tambe hopi ta yega aserka pa buska informashon i tambe pa saka potrèt tantu parti paden komo parti pafó i asina nan bai ku un rekuerdo históriko di Kòrsou.

Misa ta den mal estado!

E monumento aki ta den hopi mal estado debí na finansa ku no tin I p’esei ta urgi pa a lo ménos kuminsá un kaminda pa asina fielnan Katóliko dje área ei i turistanan por sigui bishit’é.

E edifisio aki ku ta un diseño  di e arkitekto di Rotterdam Evert Margry ta un monumento ku ta rekerí mantenshon, ya komo e tempu ku el a keda konstruí tabata traha e edifisionan ku santu di laman. E yudansa mester ta agudo ya komo e loke ta drenta di kolekta pa siman durante sirbishinan no ta sufisiente pa kubri e gastunan.

Ya pa tres siman kaba, parti di entrada di e Misa aki ku ta konta ku tres porta, no ta funshonando no ta responsabel pa habri dos di e portanan aki mas. Si e situashon ta sigui asina, parokia lo mester sera tur porta i keda solamente komo un edifisio den ruina. Asina pues e misa di Willebrordus ku ta un imágen di loke pueblo por hasi ora e ta konfia den Dios i ta pone bon boluntat, ta kore e riesgo di bira solamente komo un imágen di pasado, un ruina di loke nos por a hasi, pero no di loke nos ta hasi.

Ban duna un man

Pastor Israel a bisa ku e ta konsiente ku e situashon ekonómiko di nos pais ta pone ku no ta fásil pa  komersiantenan saka man i yuda, pero bo por ta sigur ku kada granito por aportá pa yuda pa asina por kuminsá ku a lo ménos e portanan, ta di gran balor.

Eventonan pa rekoudá fondo:

Dia promé di yüli próksimo lo bai tin un konsierto ku presentashon di diferente artista.

Dia promé di òktober lo bai tin un konsierto di Jazz  Ku diferente músikonan di Jazz.

Pa e dos eventonan aki Pastor Israel ta spera di por risibí kontribushon di pueblo, fielnan Katóliko i komersiantenan den forma di kompra di karchi i bishita na e konsiertonan aki.

Pa esnan ku kisas lo kier hasi un obra di karidat den forma di un donashon pa yuda ku trabounan, por tuma kontakto ku Pastor Israel na e number di Telefòn 687-6083. Si bo mes ta deseá na mira e situashon personalmente, gustosamente, tambe ta posibel.

Hasi bo donashon

Pa esnan ta sinti na nan kurason pa hasi un donashon, por hasi esaki riba e siguiente kuenta: MCB 16927102

Di antemano danki na tur esnan ku ta saka man I mira importansia di eksistensia di e kas di Dios aki I ku Dios lo rindi pa boso.