WILLEMSTAD.- Wikènt último tabata un di e wikèntnan di mas drùk despues di basta siman.

For di djabièrnè te djadumingu tabatin un kantidat di aktividat rònt Kòrsou. E tim multidisiplinario a sali kaya riba djabièrnè i a bai den área di Veeris, Mahaai, Nieuwestraat, Pietermaai, Kaya Wilson Papa Godett, Nieuw Nederland, Bapor Kibra i Janthiel. Di tur e establesimentunan kontrolá, 6 tabata na òrdu i a parti 4 prosèsverbal pa e.o tokamentu di músika duru, no ta hasi uso di tapaboka, no ta registrá klientenan i tambe pa krea fasilidat pa klientenan sinta riba kaminda públiko.

Kontinuando ku e kontròlnan djasabra, e tim aki a sali kaya i a kontrolá 17 establesimentu/ aktividat den áreanan di; Curaçao Festival Center, Curaçao International Raceway, Club di Shell, Nieuwestraat, Fuikstraat, Pietermaai, Kaya Wilson Papa Godett, Bapor Kibra, Janthiel i tambe Landhuis Chobolobo. 17 di e establesimentu/ aktividatnan aki tabata na òrdu i na 1 sitio so mester a duna prosèsverbal debí ku trahadónan ta duna servisio sin hasi uso di tapaboka.

Finalmente pa sera e wikènt ku basta aktividat, e tim a kontrolá 12 establesimentu/aktividat. Esakinan tabata den área di; Veeris, Nieuwestraat, Bapor Kibra, Janthiel i tambe Curaçao Festival Center. E dia aki na 2 establesimentu a duna prosèsverbal debí ku trahadónan no tabatin nan tapaboka bistí.

Mirando ku e wikènt aki tabata unu drùk, a bolbe hasi uso di e personal di VKC ku a supervisá na algun sitio e parti di registrashon di bishitantenan.

E parti aki a kana masha bon i no tabatin ningun partikularidat.