WILLEMSTAD.- Ayera Dick Advocaat i Tahith Chong tabata presente pa un rueda di prensa di selekshon nashonal, ku a tuma lugá den Corendon.

Segun e entrenadό hulandes, e sintimento di Mundial lo yega, ora e delegashon di Kòrsou yega Merka.

Pa loke ta Tahith Chong e tabatin un tremendo mensahe durante e rueda di prensa, ora nan a puntre si e selekshon ta sinti preshon bayendo Mundial. Segun e bolante ofensivo e selekshon no ta sinti preshon. ‘Preshoon ta un mama soltera ku sinku yu, ku no sa di unda e siguiente kuminda lo bini. Loke nos ta hasi ta futbòl, i nos mester disfrut’é,’ Chong a bisa.

Pa loke ta trata Advocaat e tin konfiansa den e selekshon di Kòrsou.

‘Nos a logra loke hopi hende a pensa ku tabata imposibel. Tur kos ku nos logra di aki pa dilanti lo ta chèri riba e bolo,’ Advocaat a bisa. E entrenadó di 78 aña ta kere ku Kòrsou por pone kualke rival den problema, pero ta enfatisá ku e ekipo mester di un tremendo aktuashon kolektivo pa logra esaki.

Miéntras ku Dick Advocaat a indiká  tambe ku ainda nan no tin klaridat riba e situashon di Jürgen Locadia. Esaki despues ku el a haña kòrá kontra Eskosia.

Advocaat a trese dilanti ku FFK ta den kontakto ku FIFA pa asina den e dianan aki, sa ku e delantero lo mester sinta un suspenshon òf e por hunga sin problema den mundial.