Polisnan hala atenshon di taksinan klandestino pero djis nan tei bèk

Update: Informashon adishonal ku EXTRA ta dispone di dje ta indiká ku polisnan a para e vèn i baha tur turista.  A pidi un taksi ofisial i esei por a bai ku e turistanan. E taksista klandestino por a bai for di e sitio i sigui su ruta. Si aki ratu no tin polis pa kontrolá, no tin nada ta stroba e taksista klandestino pa bolbe purba su chèns.

WILLEMSTAD.-Outoridatnan polisial un bia mas a tuma akshon i atendé ku un persona ku tabata ofresé servisio di taksi den e área di Megapir i Renaissance Resort den Otrobanda. Awe ta otro dia ku tin barku di turista na Kòrsou i komo tal taksistanan por ofresé nan servisio i asina gana nan pan di kada dia.

Sin embargo e situashon ta kambia na momentu ku taksista klandestino tambe ta presentá na e sitio i ta ofresé servisio di transporte. Ta hopi tempu kaba taksistanan i sektor di turismo ta pidi pa regla e asuntu aki. Polisnan ta tene kontrol pero djis despues taksistanan klandestino ta bolbe presentá debí ku tin aktuashon ku man duru kontra esnan ku ta falta ku lei den e pais aki. Pues ta laga polis na kaya pasobra nan mester keda kore ku taksinan klandestino ku ta bolbe bini bèk. Na algun okashon profeshonalnan den turismo a bati bèl di alerta pa esnan konserní tuma e medidanan nesesario promé ku ‘baka hoga na pos’. Si sosodé un aksidente ku un taksi klandestino, ku turista den e vehíkulo ei anto e problema grandi ta pa Kòrsou pasobra opviamente e taksi klandestino ta bai skonde algun dia i ta CTB ku plaka di komunidat mester bai trata na resolvé e daño kousá.