WILLEMSTAD.- Den wikènt tras di lomba taksistanan a laba i fèrf e lugánan di parker na parti Otrobanda. E nòmber Taxi skibi riba e asfalt kaminda ta indiká ku ta lugá pa taksi para a kita kasi kompleto. Taksistanan tin basta problema ku shofùrnan ta parker nan outo na nan lugá i ora nan reklamá, nan ta tende ku no a mira e taksi skibi abou.

Gobièrnu tin basta ratu ku no ta yudando e taksistanan pa por mantené e lugánan di parker pa taksistanan. I p’esei nan mes ta sòru pa esaki. Brantwer a yuda den wikènt pa laba e asfalt, hasié limpi i asina taksistanan a fèrf.

Nan mes ta sòru tambe pa laba e tèntnan, lugá di sinta i asta lus bou di e tènt, nan mes ta sòru pa esaki ora e ta nesesario. Despues di Otrobanda awor ta bai sigui e lugá di parker pa taksistanan na lado di Punda.

Aki tambe ta nan mes ta sòru di pinta e kaminda nan ta parker i tene limpi, ya ku ora tin aktividat den wikènt, ta hopi sushi ta keda atras na Punda. Próksimamente nan lo pone un man pa fèrf tambe e lugánan di parker pa taksistanan na lago di Punda.