Despues ku Pincho mes ta limpia su kueru, e ta pone esaki seka i pa ora e ta bai us’e e ta lag’e hoga den awa. Pincho ta usa shinishi pa e frega riba e kueru tambe i despues lab’e kit’e. Saka e kueru i kuminsá traha kuné. E ta usa palu di wabi kual e ta traha e renchinan pa pone wanta e kuerunan riba kabes di e tambú.

Korta wabi ku luna yen...

Pincho ta splika ku wabi mester keda kòrta ora luna ta yen, esta tres dia promé ku luna i tres dia despues ku luna ta yen .kemen bo tin 6 dia pa kita e palu di wabi i si kit’e ora luna no ta yen e palu ta kue ‘boor’. Esaki ta un tipo di bestia chikí chikí ku ta kome e palu lag’e wiri wiri.

Tambe por usa palu di kalbas i tamarein pero nan tin hopi bubel, i mester bai para skür esakinan pa e ta fini, pa ora di pone riba e kabes di e tambú, pa asina klaba e kueru mare.

Dos renchi...

Mester di dos renchi, un fini i otro diki. E promé ku ta pone ta e fini i despues ta bòltu e kueru riba dje i ta hinka e diki, kual ta esun ku ta bai klaba riba e tambú.

Sòru pa e kueru bai rònt i saka tur ploi, (I miéntras Pincho ta harma su tambú e ta kanta...Oni keda leu esaki no ta kueru kaduká....Oni keda leu...)

Ora kaba di pasa e kueru bon rònt di e renchi ta bai kuminsá bati klabu pa e bira strak. E siguiente klabu tin di bai kontrali di esun promé i asina ta keda bati e klabunan manda aden.

Esaki ta pa e hupel por kore nechi i no yen di bògt manera e kayanan di Kòrsou.

Sekretunan di grandi...

Pincho a lanta tende ku trahamentu di tambú ta sosodé mas tantu anochi pasobra asina e kueru ta trèk mihó. Esei ta sekretonan di grandi ku bo ta lanta tende. Pero e ta trèk su kueru riba bari kualke momentu. E bon ta ku e mester ta bon di trèk i asina e ta toka tur momentu mesun bon sin e kueru slèk. I asina grandinan tabata yen di sekreto. Tin un dicho ta bisa “si bo ke sa algu, bai puntra bo grandinan”...pero bo sa ken tin mala ehèmpel ta e grandinan aki. nan no ta konta e kos manera mester ta...Pincho a bisa ku un sonrisa riba su kara. E ta kòrda kon promé ku e tabata traha su mes tambú, el a pasa serka diferente trahadó di tambú pa trèk kueru pe. Serka tur e mester a laga e tambú i bai bin busk’e. Niun kier a siñ’e i no tabata laga sa di nan sekreto. Pero Pincho mas sabi, tabata bai kas ku e tambú ainda muhá, e tabata tòrn’e for di otro i asina el a bin traha su mes tambú.

8 klabu ta sufisiente....

Trahando su tambú, dam.... un klabu no a bai bon, ta djis sake afó i bolbe dal otro klabu aden pero no den e mesun buraku. Ta djis kambia buraku ounke segun Pincho no ta semper asina bon pa keda saka klabu., Purba pa nan ta bon semper.

I ya for di e di dos klabu por a tende e bari zona, tambú ta bin shonnan....Pa Pincho 8 klabu ta sufisiente pa e bati den e tambú. I asina Pincho a kaba di traha un tambú.

Siña hoben traha tambú...

E ta traha tambú di tur tamaño. I e ta dispuesto na pasa su konosementu over pa hóbennan pero nan mester yega serka dje si. E ta kere ku hóbennan por mara kueru asta riba bleki, pinta esaki bunita i hasié un suvenir pa bende ku turistanan. Pincho ta trahando aktualmente riba un proyekto ku un sentro di bario ku pronto lo keda dibulgá.