WILLEMSTAD.- Artista internashonal Tania Kross tin un soño. E ke krea un teatro nashonal nobo pa Kòrsou. Segun Kross proyekto pa yega na un teatro nashonal no ta fásil. “Ta importante ku hopi hende duna nan sosten.” Dia 7 di novèmber Kross ta organisá un anochi di informashon na Aula di Landhuis Habaai pa tur hende ku ke duna un kontribushon. E anochi di informashon ta kuminsá 19 or. Sala ta habri pa tur hende ku na un òf otro manera ke duna nan kontribushon pa yega na e teatro nashonal. “Ta mi intenshon ku huntu nos ta lanta un koperativa. Via e koperativa nos ke invertí den bida kultural riba nos pais i na mesun momento kuminsá traha komo kolektivo pa yega na un teatro nashonal. Ku e meta ku e teatro por habri su porta den mas o ménos sinku aña.”
Kross ta enfatisá ku un teatro nashonal ta mas ku un kolekshon di piedra. “Ta mi deseo pa nos traha huntu pa duna nos bida mas struktura. Tin hopi talento, tin hopi idea, tin hopi kreatividat. Ku e koperativa mi ke kuminsá inspirá mas hende ku ta posibel, pa huntu nos ta duna Kòrsou e teatro nashonal, ku nos komo pais ta falta pa mas ku 20 aña.”
Kross den e próksimo 100 dia tin komo meta pa registrá 500 hende ku ke duna un kontribushon. “No solamente artista, nos mester tambe hende di finansa, make-up, limpia, komunikashon, dekorashon etc., etc.. Nos ta buska un kantidat grandi i diverso di hende ku ke duna un kontribushon.”
E siman aki Kross, riba plataforma sosial, a manda un link di registrashon pa tur hende ku ke partisipá. Tambe e ta invitá tur hende pa ta presente na anochi di informashon na Landhuis Habaai djaluna awor.
Tur hende ku ke registrá for di awor por subi na: https://forms.gle/zbH86mDx8SguYYqh9.
Kross, ku despues el a biba basta aña na Hulanda i Alemania, ta biba na Kòrsou atrobe. Resientemente el a papia ku algun medio di komunikashon, tambe na Hulanda, tokante su soño pa lanta un teatro nashonal di nobo pa Kòrsou. “Mi a haña hopi reakshon for di koleganan, artistanan i hende ku ta stima Kòrsou.” Emisora AVRO/TROS ta sigui Kross den e próksimo periodo den su lucha pa lanta un koperativa i krea un teatro nashonal pa henter Kòrsou. “Tambe mi lo sigui informá i motivá pueblo di Kòrsou. Pasobra un teatro nashonal ta di nos tur.”