VENEZUELA.-Bista di mundu ta fiha riba un tankero super grandi ku a kuminsá yena ku awa i ta i a bai len di un banda na kosta di Venezuela. Informashonnan internashonal di AP i Yahoo ta indiká ku e tankero FSO Nabarima ta yena ful ku krudo pisá pero e barku su situashon ta pésimo despues di hopi tempu sin haña e mantenshon tan nesesario. Si no aktua hopi lihé e barku aki lo por senk i asina kousa daño ekológiko ireparabel na kosta di e pais bisiña i tambe na paisnan den Karibe, Aruba, Boneiru i Kòrsou, asna ekspertonan marítimo ta duna di konosé.

Loke ta hasi e preokupashon ainda mas grandi ta e echo ku te ainda e gobièrnu sosialista di Venezuela no a bisa nada di e kaso aki ni tampoko kiko ta nan intenshon ku e barku aki yená ku krudo pisá. Lidernan anti gobièrnu di Maduro, manera Eudis Girot, a hala atenshon di presidente Maduro pa e kaso spesífiko aki. E ta pidi e presidente venesolano pa aktua i evitá un desaster di medio ambiente.

El a invitá presidente Maduro pa drenta un helikòpter i bai na e sitio pa e mes mira e situashon.

E barku Nabarima ku ta midi 264 meter ta nabegá bou di bandera venesolano i segun informashonnan e ta práktikamente yen ku 1.4 mion barí di krudo, esei ta mas o ménos 5x e kantidat di e barku Exxon Valdez ku a sòru pa un derame petrolero grandi na 1989.