Negosiashonnan pa operashon refineria no ta keda kla pa 1 yüli

WILLEMSTAD.- Haf di Kòrsou pa hopi tempu semper tabatin diferente tankero, barku di karga i asta krusero. For di momentu ku situashon di refineria a kambia apénas por mira un tankero den haf. Esei ta e kaso awe, na momentu ku EXTRA a tuma nota di tres tankero den haf. Esei a sòru di kapta atenshon di vários persona mesora.

EXTRA a bai buska informashon riba esaki i a komprondé di outoridatnan kompetente ku e barkunan den haf no ta pa Refineria/Curaçao Refinery Utility (CRU) pero ta trata di tankeronan ku tei pa entre otro pa un kompania estatal.

EXTRA a probechá i hasi pregunta mesora kon ta para ku kombersashonnan entre CORC, RdK i gobièrnu pa finalisá akuerdonan pa operashon di e refineria. Riba esei EXTRA a haña tende ku ta falta reglamentu di dokumentunan nesesario den gobernashon, pero mester bisa ku esei ta asina te ku medio yüni pues promé ku e gobièrnu nobo a sinta. E último informashon den e kuadro aki ta ku no ta bai logra keda kla pa 1 yüli manera e invershonistanan a spera.