Riba 60 mion disponibel danki na kompromiso polítiko ku Ulanda

WILLEMSTAD.-Tanten tin pandemia e sosten finansiero na empresanan lo sigui asina minister Steven Martina, enkargá ku ministerio di Desaroyo Ekonómiko a duna di konosé. E mandatario a tira un bista bèk, huntu ku funshonarionan di su ministerio, kuantu yudansa a duna na empresarionan i kiko esei a kosta. E minister a enfatisá na vários okashon ku e yudansa ku gobièrnu por duna na empresarionan ta danki na e kompromiso polítiko ku a sera ku Ulanda resientemente.

Aparte di e areglonan konosí manera NOW i TBZO a logra dos areglo nobo mas, pero eseinan ta drenta na vigor otro aña, ku otro palabra kuminsando na yanüari 2021 lo por kuminsá apliká pa e areglonan nobo.

NOW ta pa yuda empresarionan mantené trahadónan den servisio. E kompania ku apliká ta haña un suma di plaka ku e por usa pa sigui paga su trahadónan, pero tantu e kompania komo e trahadó mester entrega 20%. Pa loke ta trata e areglo TBZO esei ta pa empresarionan individual ku ta bini na remarke pa haña yudansa finansiero den tempu di pandemia.  Aparte di yudansa finansiero ta yuda tambe pa duna ‘coaching’ na empresarionan, supsidio pa salario i mas.

E areglonan nobo ta entre otro TVL, esei ta enserá ku por apliká pa sierto rekompensa pa gastunan fiho ku e empresarionan tin. E di dos areglo nobo ta un programa di kapasitashon ku lo bai kana via SOAW. Esei ta pa hendenan ku a pèrdè trabou.

Mas aleu e minister a bisa ku awor aki den novèmber esnan ku apliká pa novèmber por apliká mesora pa desèmber tambe. Mas detaye den edishon di EXTRA.