WILLEMSTAD – Entrante djamars dia 30 di yüli 2019 e tarifa regulá di gasolin (baha ku kasi 2 sen) i diesel (baha ku 12 sen)  lo baha na Kòrsou. Tambe tarifa di awa i elektrisidat lo baha entrante djaweps dia 1 di ougùstùs 2019. Esaki Bureau Telecommunicatie en Post (BT&P) ta partisipá den su komunikado mensual riba e partikularidat aki. BT&P ta supervisá e desaroyo di preis di produktonan petrolero i di utilidat.
Kálkulo tarifa produktonan kombustibel
E kálkulo di tarifa pa Mogas 95, Gasoil LSD, LPG 20 i LPG 100 konosé e komponentenan 1. Preis di kompra, 2. Impuesto di importashon LSD, 3. Márgen pa Curoil, 5. Sùrplùs/Défisit (Recovery), 6. Supsidio krusá, 7. O.B. di 6% pa benta por mayor, 8. Márgen pa agente i 9. O.B. di 6% pa benta por detal. Pa sierto komponente e tarifa sero ta konta – sea temporalmente òf nò –. E tarifa pa benta por mayor ta inkluí e promé shete komponentenan miéntras ku e tarifa pa benta por detal (na usuario final) ta inkluí tur nuebe komponente.
Ta determiná e preis di kompra, kaminda kalkulashon ta kuminsá, mensualmente pa e luna siguiente a base di Curoil su fakturanan di kompra di e luna anterior. Pues: e preisnan di kompra ku ta stipulá pa ougùstùs, ta basá riba Curoil su fakturanan di kompra di yüni. E preisnan di kompra akí ta wordu revisá dor di notashon di preis internashonal.
Ta tene kuenta tambe ku otro eventual gastunan, relashoná ku e kompra, por ehèmpel gastunan di inspekshon. Dor di e lapso di dos (2) luna den e mekanismo pa determiná preis, por ta nesesario pa deskontá eventual diferensia entre e preis di kompra regulá i e montantenan di kompra real, di forma retroaktivo via e elemento ‘Sùrplùs/Défisit’.
E bahada di e tarifa usuario final pa e produkto Mogas 95 i Gasoil LSD ta prinsipalmente resultado di un bahada di e preis di kompra i e korekshon den e komponente sùrplùs/défisit.
Pa loke ta trata e preisnan di kompra pa Mogas 95 ta remarká adishonalmente ku esaki meskos ku luna pasá por parti ta basá riba un kompra relativamente grandi na luna di aprel 2019 debí na e paro di e produkshon di rafinaderia. P’esei e bahada ta ménos fuerte ku e desaroyo riba merkado internashonal durante di yüni 2019.
Kálkulo tarifa awa i koriente
E kálkulo di e tarifa pa awa i elektrisidat tin dos komponente: e tarifa básiko i e klousula di kombustibel.
E klousula di kombustibel ta konsistí di dos elemento: kompra di koriente i gastunan di kombustibel. E ‘kompra di koriente’ ta basá riba e preis pa e energia ku tersernan ta suministrá, manera energia di bientu, di solo i di CRU. ‘Gastunan di kombustibel’ ta enserá produkshon di energia dor di Aqualectra mes. Sin embargo, kada luna e uso di e diferente medio pa produkshon – e asina yamá ‘meskla di produkshon’ ta varia. P’esei BT&P ta
determiná e balor di e klousula di kombustibel mensualmente basá riba e pronóstiko di Aqualectra, di kiko e meskla di produkshon lo bira, den e kaso aki pa e luna di ougùstùs. Si un luna despues resultá ku e elemento akí tabata muchu haltu òf muchu abou, ta korigí esaki. Den e kaso akí, ta trata di e luna di yüni. BT&P ta determiná e tarifa básiko pa tantu awa komo elektrisidat un biaha pa aña. E tarifa akí ta enserá tur otro gastu (fiho) pa e produkshon di awa i elektrisidat i tambe e gastunan pa e distribushon i e entrega di esakinan, manera gastu di personal, di mantenshon, depresiashon, etc.
E bahada di e tarifanan pa awa i elektrisidat ta kousá prinsipalmente dor di e resultado di un subida
leve den preis di kombustibel i elektrisidat pa respektivamente produkshon di elektrisidat i di awa i
tambe faktor di korekshon abou ofer di e luna di yüni.
Aprobashon i fihamentu
BT&P ta asesorá Konseho di Minister (KdM) enkuanto e tarifanan nobo. Solamente despues ku e KdM aprobá e propuesta, e Minister pa Desaroyo Ekonómiko, ku a la bes ta enkargá ku asuntunan di energia, ta fiha e tarifanan. Eseinan ta e tarifanan máksimo ku por usa un luna largu. Ku e prosedura akí, ku ta konsiderá faktornan internashonal i lokal, e supervisor BT&P ta vigilá e entrega di kombustibel, awa i elektrisidat na e poblashon lokal di forma independiente i transparente, pa esaki ta kontínuo i rasonabel.