Wes a dun’e benefisio di duda i dun’e libertat inmediato

WILLEMSTAD.- Wes di korte di promé instansia ayera a apsolvé S.Susana (26) akusá di a maltratá su propio baby di 2 luna, di tur kulpa.

Wes a bisa ku no tin un prueba konkreto den e kaso aki. E akusado ta bisa ku e baby a kai, miéntras mama di e baby ta bisa ku e hòmber mes a bis’e di a maltratá e yu paso e no kier a lag’e drumi anochi.

E baby tabatin vários manchanan blou na su kurpa, su nanishi tabata basha sanger, kara hinchá, pero no por indiká ku esaki ta bin di maltrato òf paso e baby a kai manera e tata a bisa.

Ta e mama su palabra kontra di e akusado.

Susana a keda enkarselá despues, ku mama di su yu a hasi denunsia kontra di dje.

E akusado a konta ku e dia ei e baby tabatin hopi sleim, e tabata yora hopi i su mama mester a bai dòkter kuné.

Debí ku e baby no kier a stòp di yora, el a kue pa karg’e pa kambia su bruki, pero e baby a kai fo’i su man riba un tas ku tabatin algun cd aden i ku tabata pone riba un “bracket” .

El a keda bati e baby riba su lomba pa purba lag’e stòp di yora. Despues ku e mama a bin buska e baby i a mira e parti nan blou na su kurpa, el a kulp’e di a maltratá e baby.

Segun e akusado, na chikí e tabata wòrdu maltratá masha hopi mes i a bisa ku hamas  e lo a maltratá su propio yu.

E mama a konta ku dor ku el a pèrdè su kas, el a hiba e baby serka e akusado i su mama na nan kas pa kuid’e.

E dia ei el a bai kas di e akusado, bai buska e yu pa e bai dòkter kuné.

Ora el a yega na e kas, e akusado a sali pafó sende un sigaria i tabatin un bate di base bal den su man.

E akusado a bis’e: “ Mi a dal e yu aki, paso henter anochi e no a laga mi drumi”.

E dama a spanta keda ketu. Ora e hòmber a bin pafó ku e baby, el a mira ku e baby su kara tabata hinchá i tabatin herida, su lomba tabata blou i e tabatin basta sla na su kurpa.

E akusado a bis’e "si bo no ta gusta bo bin aden, e or’ei  mi ta bati abo ku yu ku bate”.

E dama a opta pa keda ketu i evitá lo pió i a sali fo’i dje kas i bai polis i hasi denunsia. Banda di esaki e dama a bisa ku na barika tambe e akusado a agredié, el a hasi denunsia i nada a bin afó.

E akusado a ninga tur  loke e mama di e yu a deklará  i a  bisa ku no ta kuadra ku el a menasá e dama ni ku el a agredí e baby.

Segun e dosié, polis mester a bai na vários okashon den pasado na e adrès di e akusado ku ta den kaya Madi,  pa motibu di vários problema relashonal, maltrato severo, ladronisia i vários otro aktonan ku e akusado tabata keda akusá di dje .

Tambe e tabatin vários problema ku el a hañ’e den dje na skol, kaminda polis mester a presentá pa atendé kuné.

Durante di e kaso,wes a lesa den e dosié ku 3 aña pasa, el a hañ’e den problema ku hustisia na Hulanda i fo’i chikí e tabatin problema ku agresividat. Banda di esaki el a keda na vários okashon den GOG.

Segun rapòrt sikológiko, e akusado no tabata e hende apropiá pa kuida un baby. Tabata un mal idea di a laga e yu serka  dje.

Segun rapòrt sikiátriko, e akusado tin problema ku komportashon, ta uza hopi preshon pa logra algu, tin “ Licht verstandelijke beperking”, inteligensia abou, síntomanan di outista i vários otro desórden mental.

El a keda den hopi institutonan hubenil dor di su agresividat.

Fiskal a haña e e akusashonnan kompletamente probá abase di e deklarashon di mama di e baby, rapòrtnan médiko i sikiátriko .

Fiskal a bisa ku ta trata aki di maltrato severo di mucha. Fiskal a tene kuenta ku tur e rapòrtnan ku tin di e akusado i tambe tur e bianan ku polis mester a bai e kas pa

Mirando tur esakinan, fiskal ta yega na un demanda di 15 luna di kual 5 kondishonal mas 10 mil florin di daño perhuisio.  Ayera durante e veredikto wes a bisa ku e ta duna e akusado benefisio di duda pa falta di prueba. Ayera  mes e akusado por a bai kas.