WILLEMSTAD.- E akusado O. W.(47) mester bai sinta un kastigu di 1 aña di prizòn, pa un kaso di maltrato ku e ta keda akusá di dje.  Segun e akusashon, O.W. ta keda akusá  di a maltratá e víktima di fam H.R., ku tabata su eks pareha. O.W. ta den libertat i a presentá den sala di korte, pa responsabilisá su mes pa su akto. E víktima tambe tabata presente.

Segun e denunsia di e víktima,e tabata kompartí bida ku O.W., pero el a gar’e ku otro dama. Riba e dia enkuestion, O.W. lo a dal’e moketa bent’e riba kaya pa despues lastr’e. Despues O.W. a kue tene na su garganta i ku forsa a dal’e moketa den su boka, kual e akusado a keda seriamente leshoná.

E tabatin un herida ku tabata sangra na su lep i tambe plèk nan blou, rònt su kurpa. Tambe e tabatin herida na su brasanan i tabata keha di bastante doló. Pa loke ta trata e di dos akusashon, e víktima ta keda akusá ku riba e mesun fecha enkuestion, el a menasá e víktima ku e lo batié i lo hasi uzo di un arma. Tambe el a menas’é, ku e lo sende su kas na kandela.

Mas aleu e akusado a bisa e víktima den un tono agresivo, "mi ta dal bo un bala den bo kabes”. Pa loke ta trata e di 3 akusashon, O.W. ta keda akusá di a sekuestrá e víktima, dor di kue tene na su garganta i lastr’e hink’e den outo. Segun e víktima, e hòmber a kore den outo kuné di for di 2 or di mèrdia, te ku 5 or di atardi, miéntras e tabata agredié ku forsa den su boka, maltrat’é i menas’é.

Pa loke ta trata e di 4 akusashon, Ministerio Públiko ta akusá O.W. ku den e periodo di 27 yüli 2018 te ku 20 mart 2019, el a maltratá e dama, dor di a uza un arma den forma di un planki di palu. Segun e denunsia di e dama, O.W. a agredié ku e planki rònt su kurpa i tambe a dal’e ku moketa den su kara.

Tambe el a dal’e ku moketa den su wowo, morde den su kara, kual e víktima a haña herida i tabatin hopi doló. Segun e informashon, den e dosié e akusado tin 8 yu ku 4 mama. E dia ei e víktima a yega i a haña otro dama serka e akusado.

Esei a pone ku el a drenta e kas, kue tur su kosnan pa bai kuné.

Pero e akusado no a gusta esaki i a agredí e dama, lastr’e hink’e den outo i bai kuné.

E akusado a ninga ku el kometé e echonan ku e ta keda akusá di dje.

El a bisa, ku ta e dama mes a drenta outo bai kuné pa nan papia.

Segun e akusado, ora ku e damanan a topa, nan a bringa ku otro i dal otro ku palu. E no tabatin nada di aber ku loke e dama a deklará.

Hues a relatá, ku e testigu ku a yama polis, a deklará, ku el a mira kon e akusado tabata lastra e dama i agredié. Polis ku a kore yega, a topa e dama na Palu Blanku tur heridá.

Fiskal a haña e akusashon kompletamente probá abase di e deklarashonnan di e víktima, rapòrt médiko i tambe e testigu ku a mira e akusado agredí e dama. Mirando tur esakinan fiskal ta haña ku e akusado mester bai prizòn bèk, mirando e leshinan serio ku e dama tabatin na su kurpa.

Fiskal ta yega na un demanda di 24 luna, di kual 12 kondishonal. Hues a tuma desishon mes ora i a bisa ku e ta haña  e akusashonnan ta kompletamente probá, abase di tur e pruebanan ku tin den e dosié i tambe e deklarashonnan. Mirando esakinan, hues no ta mira motibu pa desviá for di e demanda di fiskal.