WILLEMSTAD.-  Hues Edelenbos ayera a bai di akuerdo pa kondená tata di kriansa, ku a kometé aktonan di inmoralidat ku su yu di kriansa menor di edat, na 36 luna di kual 18 kondishonal.

Ta trata di e hòmber E.S. (31) ku ta keda akusá pa 4 echo kastigabel, relashoná ku inmoralidat kontra e menor ku e tempu ei no a kumpli 12 aña ainda.

Durante tratamentu di e kaso hues a revelá ku e menor a deklará na polis, ku a para bira kustumber ku e mester a  hasi sex oral 3 bia pa siman pa e akusado.

Un di e akusashonnan tabata 2 video i algun foto ku polis a haña den e hòmber su telefòn, di aktonan inmoral ku e tabata laga e menor hasi kuné.

Segun deklarashon di e menor, e hòmber a asta  bis’é ku e ta hasi sex oral mihó ku su mama.

E akusado ayera a bisa ku dado momento, e no tabata sa mas kon pa e para e aktonan seksual entre e ku e menor. E tabata sa ku e no ta hasiendo korekto, pero e no tabata sa un manera pa stòp e akto.

El a splika ku un di e videonan, el a grab’é nèt ora e tabata papia ku mama di e menor na telefòn. E telefòn a habri i kuminsá graba sin e sa. E di dos bia e ta atmití ku el a graba e menor, pa e sinta wak despues.

Hues a duna di konosé ku na polis e akusado a bisa ku el a lubidá di “delete” e video i fotonan. “Sino  awe e lo no a hañ’é den problema aki ”.

E akusado a bisa, por ta señal di Dios ku su kasá a haña e materialnan den e telefòn, ya asina e akto aki por a kaba. Hues na su turno a bisa e akusado, ku otro palabra e ke bisa ku si  lo no a gar’é, e lo a sigui ku su aktonan. E akusado a bisa ku e no por bisa esei.

Banda di e akusashonnan aki, hues a bisa ku polis a haña un planchi di mariwana na e kas, durante entrada hudisial. E akusado a bisa ku esei tabata pa su propio uso, debí ku e ta huma mariwana diariamente i sigur 3 bia pa dia.

Hues a duna di konosé ku e damita a deklará na polis, ku e akusado tabata dun’é mariwana tambe pa e huma. E akusado a atmití esaki i a bisa ku e damita tabata kurioso i tabata ke purba mariwana i el a dun'é, lag’é purba. Hues a bisa e akusado ku pa e echo aki tambe nan ta tum’é hopi na malu.

Rapòrt sikiátriko a duna di konosé ku e akusado ta kompletamente responsabel pa su akto.

E no tin niun desórden mental i sa presis kiko e tabata hasi. Sikiater ta haña e chèns pa algu asin’aki bolbe tuma lugá hopi abou serka e akusado.

Kontrali na e rapòrt sikológiko, ku ta bisa di ta mira ku e chèns pa algu asin’aki bolbe ripití ta  poko haltu.

Na aña 2010  e akusado a keda kondená pa un kaso di atrako ku violensia.

Fiskal tabata kòrtiku den su rekisitorio, debí ku hues a trata e dosié ampliamente. Fiskal a bisa ku e rapòrt médiko a indiká ku e damita ainda tin su virginidat.

Pero e echo ku e akusado a trata na penetrá i ku e damita a sinti doló, e akto aki ta pisa enorme den e akusashon.

Mirando tur esakinan, fiskal a haña e 4 akusashonnan kompletamente probá i a demandá e akusado na 36 luna di kual 18 kondishonal. Hues den su desishon a bisa e akusado ku fiskal a pidi un kastigu hopi abou pe den e kaso aki.

Nan a tene kuenta ku e gravedat ku e kaso aki a kousa e famia, i tur e konsekuensia ku esaki a trese kuné, ora el a sali den media. Mirando tur esakinan hues a bai kompletamente di akuerdo ku e demanda di fiskal.

Ku e kondishon ku e akusado mester keda leu for di e damita.