WILLEMSTAD.- E akusado D. Felipe (23) ayera a bisa ku e ta habrí pa haña yudansa pa e stòp di rabia muchu lihé. Felipe ta keda akusá di a maltratá mama di su yu den e periodo di 24 di desèmber 2019 te ku 11 di mei 2020 dor di mordé, push’é, bent’é abou i tambe choké.
Tambe e ta keda akusá di a menasá e dama bisando e “mi ta bai, pero mi ta bin bèk pasó awe hende ta muri” òf “mi ta sende e kas na kandela”.
Segun deklarashon di e víktima, e tabata huntu ku e akusado, pero direpente el a stot e, miéntras e tabatin nan yu ten’é. A surgi un bringamentu entre nan ku a sali fo’i man.
Segun e víktima su tata a kore bin pa intervení, pero Felipe a kue tene na garganta i chok’é.
E akusado ayera a bisa ku e dia ei el a bai kue djòp bin bèk, ora el a yega kas, e tata i e mama di e dama a menas’é. El a bisa ku e tata a kue kuchú pa hink’é. Segun e akusado, e no a dal e dama manera nan ta bisa. El a djis dun’é un stot. El a konta ku e ruman di e dama e dia di e suseso, tambe a mand’é un blòki.
Segun e akusado ta e tata di e dama a chok’é i dal e, pero e na su turno no a hasié nada.
Hues a relatá ku na polis e akusado a deklará ku tata di e dama ta huma base i bebe fuma. E ta haña esei malu pa su yu ku ta einan. Dia ku el a reklamá e dama, a surgi e problema entre nan.
Fo’i 20 di mei último, e dama a bis’e ku e no mag di wak su yu mas.
E akusado a bisa ku e ke yudansa pasó hopi bia e ta sinti su mes rabiá i por reakshoná poko agresivo.
Fiskal a haña e akusashon probá pa maltrato i menasa i a demandá e akusado na 6 luna kondishonal mas guia di Reclassering.
Abogado Scheperboer –Parris a bisa den su defensa ku hopi bia su kliente mester a soportá kon tata di e dama ku ta “opa” di su yu, ta bin kas fuma, haltu di huma base òf halá. E ta kana presentá riba tur hende den e forma ei i esei ta pone ku el a bisa mama di su yu ku no por sigui asin’ei mas mirando ku su yu ta ei nan. Esei tabata e motibu di e diskushon ku a sali fo’i man. Segun e abogado, e akusado ta un gai hopi trankil i no tabata por ku e situashon mas.
Hues den su desishon a desviá for di e demanda di fiskal i a kondená Felipe na 4 luna kondishonal, mas 2 aña di prueba i guia di Reclassering.