E kier a hasi tur posibel pa duna su yu di kome

WILLEMSTAD.- Hues a pasa man na su kurason i a duna e akusado F.L. (31) chèns e bia aki, pa sigui kuida su yu menor, despues ku fiskal a hasi demanda di 18 luna pa violashon lei di opio.

Ministerio Públiko ta akusá e akusado di konsientemente a pòst pakete nan ku droga.

Ta trata di un pakete ku tabata kontené mas ku 500 gram di koka den vários produkto di uso.

E akusado a presentá den sala di korte, pa responsabilisá su mes pa su akto. El a bisa ku e tabata konsiente ku e pakete tabata konten’é droga, pero el a hasié pa nesesidat.

Segun e akusado el a haña  250 florin pa pòst e pakete.

Mas aleu el a duna di konos’é, ku e no tin un trabou figo i ta kue djòp pa kuida su yu muhé menor di edat, ku ta biba serka dje.

Segun e akusado, no ta tur dia e ta haña djòp i p’esei a tuma e desishon, di pòst e paketenan pa e haña sèn pa kumpra kuminda pa un periodo largu.

El a splika ku e tin kustodia di e yu i p’esei e ta hasi tur kos posibel pa kri’é. E ta aseptá ku esei no tabata e mihó manera i ta lamentá loke el a hasi.

Fiskal a haña e akusashon legalmente i konvinsentemente probá.

Fiskal a duna di konos’é ku normalmente e akusado lo a haña 18 luna di kual 9 kondishonal pa e kaso aki, pero e ta tene kuenta ku e akusado a ser honesto i atmití su kulpa. Mirando esaki fiskal a demandá e akusado na 12 luna kompletamente kondishonal, 3 aña di prueba, mas 240 ora di trabou pa komunidat.

Hues den su desishon a bisa e akusado, ku si ta pe, e lo a disidí di otro, pero fiskal a yud’é pa balansa su desishon.

Mirando esaki hues a bisa ku e lo pasa man na su kurason i ta bai kompletamente di akuerdo ku e demanda di fiskal.   Segun hues, e ta tene kuenta ku e yu aworakí, pero si e akusado bolbe kometé algu similar, e tin ku sinta tur kos.