WILLEMSTAD.- E akusado P.C. (25) ayera a atmití ku e tabata bende mariwana pa por kria su mama, yunan i su señora. P.C. a presentá den sala di korte, pa motibu ku el a keda akusá di tabatin 879 gram di mariwana den su bibienda.
Polis a haña un tep anónimo, ku den un bibienda den área di Seru Grandi na kas di e akusado, tin bendementu i kultivashon di mariwana. Promé ku e tim di polis a bai na e adrès, nan a wak den nan sistema ku na aña 2017 tabatin un entrada hudisial na e mesun adrès, kaminda a haña un kantidat di mariwana i a detené 4 persona.
Dia 22 di yüli último, polis a tene un entrada hudisial na e adrès enkuestion i a haña un kamber ku kantidat di 103 mata di mariwana kologá na muraya. Tabatin fèn ku ta supla airu riba e matanan i tambe vários kaha i hèmber ku mariwana aden. Banda di esaki, polis a konfiská vários otro artefaktonan pa prosesá e benta di mariwana.
Na promé instante e akusado a deklará na polis ku ta di un tal Brayen e mariwananan tabata, pero ayera durante tratamentu di e kaso, el atmití ku e matanan ta di dje i ku bèrdat e tabata bende mariwana pa kria su famia. El a bisa tambe ku e tabata traha zeta ku e blachinan. Fiskal Girigoria –Hernandez a haña e akusashon kompletamente probá i a demandá e akusado na 9 luna di kual 4 luna i mei kondishonal.
Hues den su desishon a desviá for di e demanda di fiskal i a demand’é na 270 dia di kual 135 kondishonal ku un periodo di prueba di 3 aña.