Kreatividat ta loke nos a ripará siendo serka Nicolle Lourens konosí komo Nigrita den Fleur de Marie. Apesar di tempu difísil pa un aña kaba, Nicolle a sigui perseverá i ta mei mei di tur e artistanan kolega di dje den kurason di nos sentro di siudat. El a konta nos di Djasabra di su arte i en partikular e tatuahe temporal Henna ku e ta asina famoso p’e aki na Kòrsou.

Di hasi uña, kabei pa arte...

Nicolle a konta ku semper e ta gusta krea kos. For di chikí e ta gusta kosnan di man, kosnan chikí chikí manera hasi uña, kabei i tur un tiki, pero sin komprondé ku ta arte e tabata bezig kuné. Mas el a krese, el a komprondé ku ta arte e gusta hopi. Asina el a dal e paso pa konsentrá riba loke mas e ta gusta. Nicolle ta gusta reta su mes pa hasi algu nobo. Si e haña algu great, e mes ke hasié. E no ta simplemente kumpra e kos ei pero e mes ke trahe, i asina el a kuminsá ku e arte di Henna. E tabata hañ’é bunita pero nunka tabatin e posibilidat di haña un hende pa hasié pe. Ora el a topa  e pakete kla pone den pakus, el a kumpr’é i a kuminsá trein tiki tiki. El a keda reta su mes pa hasié mas mihó i mas mihó te e por domin’é awor hopi bon.

Henna...

Nicolle a konta ku e ta gusta e Henna ku ta marka blou skur. Ta trata aki di un fruta ku ta krese den Amazon. Si wak ‘online’ por mira indjannan ku e liñanan pintá na nan kurpa, fini fini ta e mesun produkto nan ta usa, Tambe den e Henna mas maron/kòrá kima i esei ta bin for di India/Marocco. Ta trata ei di un mata i ta usa e blachinan seku di e mata, machiká nan i esei ta meskla awa, lamunchi i ‘essential oil’ i krea un pasta pa pinta kuné. Esei ta e dos tipo di Henna ku Nicolle ta pinta kuné, esta e maron i e pretu.

Bendishoná ku Henna...

Den e kultura indjan i e mòslemnan e tattoo aki tin su nifikashon. Nan ta pinta nan diosnan, nan ta pinta dirigí riba diseñonan manera tèmpel ku tin na India. E ta dirigí riba e arte di Henna ku ta nifiká ku ora bo ta wòrdu pintá ku e Henna, nan ta bendishoná bu. Por ehèmpel si bo ta bai kasa òf un yu a nase. Meskos ku ta duna un hende kisas un regalo, esei ta e Henna pa e kultura ei. Nan ta pinta e Henna i segun nan ta pint’é, nan ta deseá tur kos bon.

Tatuahe di Henna...

Nicolle a profundisá su mes den e historia di Henna pa e sa ta kiko e ta hasiendo i pa e por duna un splikashon ora hende puntr’é. I na Kòrsou el a bisa tin hopi hende interesá pa pone e Henna. El a ripará ku tin hopi hende gusta tatuahe i esaki  ta un posibilidat ku si bo no tin sigur ainda òf si bo ta un hende ku no ta kere den tatuahe ku ta keda pa semper, Henna ta e mihó opshon. E por hasié su forma liber esta krea algu for di su mente, pero tin hende ta bin ku nan mes diseño. E por pint’é pa nan i e hende ta bai tèst ku nan ta gust’é. Nicolle a bisa ku tin hende ta lag'é pinta liber i despues asta nan ta bai prek despues. E tin klientenan figo ku ta bin kada bes di nobo pa pone un tatuahe. E hende ei kisas no ke e tatuahe real pero nan ta haña tòg leuk pa nan tin un tatuahe i p'esei ta pone e Henna ku tòg por kit’é despues di un temporada. E Henna tatu ta dura mas òf ménos un siman i mei te 2 siman. E wer di Kòrsou ta laga e Henna dura un siman pa 10 dia pasobra nos ta soda hopi. Pero si tabata den eksterior e lo a dura muchu mas.

Arte for di kurason...

Nicolle Lourens Nigrita a konta Djasabra ku e no a siña den direkshon di arte pero ta su kurason tabata sinti pa arte i tiki tiki el a trein. I prinsipalmente den e direkshon di Henna el a bai profundisá mas. I dor di trein i trein, dado momentu e por a hasié fásilmente. Tambe el a purba pa no keda pinta meskos ku tin riba pòtrèt pero krea su mes diseño loke di mes ta hasi e arte aun mas bunita. Esei tambe dado momentu ta pone un hende wak un Henna i sa mesora ku esei ta di Nigrita. Meskos ku ora e wak artenan ‘online’, e por rekonosé kua ta di kua artista. Ta masha dushi ora bo tin bo propio identidat den e arte.

Mei mei di tur otro artista den Fleur de Marie...

Nicolle Lourens su nòmber artístiko ta Nigrita i e ta sintié asina dushi di ta mei mei di tantu artista asina den Fleur de Marie. E ta masha dushi pasobra nan por sinta huntu i krea kosnan huntu òf papia over di arte. E ta un stail di “soort zoekt soort” den kaso ku tur e artistanan ta gusta djòin otro. I nan por papia di tur kos rondó di nan. E ambiente ta dushi, e hendenan ku ta biba den e bario ta un famia grandi i ta yama bu bon biní i e ta sintié parti di Fleur de Marie. Nigrita tin mas di un aña den Fleur de Marie i ta masha dushi ku nan tur huntu, atardi sinta kombersá, klientenan ta bin sinta den kurá  i e bario ta trèk hende pa bin einan.

Henna riba kurpa i riba kuadro i hopi mas...

Nigrita no ta solamente Henna pero e gusta tambe krea ambiente. Por ehèmpel e ta pinta un muraya i komo e ta traha hopi ku turista e ta pinta e palunan ‘dreif hout’ i e ta pinta eseinan. Nigrita ta gusta naturalesa i ta pinta hopi naturalesa. I awor e mesun Henna ku e ta pinta na kurpa e ta bezig ta pintando riba kuadronan, paña, sapatu i den un palabra tur loke e haña den su kaminda.

Antes un hòbi awor mi trabou...

Hopi bon kla Nigrita a bisa ku loke e ta hasiendo awor aki, ántes tabata un hòbi pe, pero awor e ta su trabou i e ta bibando di dje tambe sigur pe último 2 aña i mei. E ta hasiendo loke e gusta i komo ta su mes negoshi e tin espasio pa sigui bira mihó den dje. Si e tabata traha otro kaminda e lo no tabatin tempu pa su arte. Awor aki e ta traha su tempu pa e por sigui bira mihó i no keda ku e Henna su pero purba otro kosnan tambe.

Pinta mi mes i subi kaya...

Apesar ku tabatin temporada será debí na COVID-19, Nigrita a splika ku prinsipalmente na kuminsamentu, teniendo na kuenta ku e ta traha solamente ku turista tabata poko difísil pe. Su salario tabata keda kreá dor di turistanan di barku i komo nan a stòp e mester a inventá algu nobo. El a bai konsentrá mas riba hende lokal. Komo den e temporada e tabata den kas será el a kuminsá hasi propaganda pa lokal. Por ehèmpel e tabata pinta su mes i drenta supermerkado i asina hende ta mir’é.

Kontakto

Nicolle ta alkansabel via di; 5218742 i page Nigrita riba Facebook i tambe Instagram tambe ta Nigrita_Nigrita. I e ta situá den edifisio blou djis na skina den Fleur de Marie