WILLEMSTAD.- Djasabra pasá un kantidat di periodista i profeshonal di media di Kòrsou a partisipá den un Climate Fresk Media Master Class, kaminda a pone atenshon riba e kousanan i konsekuensianan di kambionan di klima. E enkuentro na LionsDive Beach Resort tabata organisá pa Club 17 den kuadro di e siman di Climate Fresk i tabata spesialmente pa media lokal i e organisashon a risibí sosten di KLM. Studiante di University of Curaçao tambe a partisipá.

E tayer no tabata traha ku un presentashon tradishonal, sino ku karchinan ku e partisipantenan mes mester pone den e órden korekto di kousa i konsekuensia. Di e manera ei, konseptonan manera aktividat humano, kombustibel fósil, emishon di CO₂, oumento di temperatura, dirtimentu di eis riba tera, oumento di nivel di laman i pèrdida di biodiversidat ta ser konektá ku otro.

E resultado ta un skema grandi ku ta mustra kon aktividat humano, via emishon di gasnan di efekto “broeikas”, finalmente tin konsekuensia pa naturalesa, ekonomia i komunidat. Durante e seshon na Kòrsou, e partisipantenan a traha riba un karta klimátiko asina i nan mes mester a deskubrí e relashonnan entre e diferente faktornan.

Di siensia pa emoshon

E Media Master Class a konsistí di kuater parti. E parti prinsipal, ku a dura mas o ménos un ora i mei, tabata dirigí riba komprondementu di e siensia tras di kambionan di klima. Despues a sigui un resúmen kreativo, un kòmbersashon tokante e emoshonnan ku kambionan di klima ta lanta i, pa finalisá, un diskushon tokante posibel akshonnan.

No tabata trata solamente di temperatura i CO₂. Durante e presentashon tambe a trata tópikonan manera sekura, inundashon, ola di kalor, kandela di mondi, produkshon di kuminda, akseso na awa dushi, salú, migrashon i desigualdat.

Un parti separá tabata dediká na e reakshon emoshonal riba kambionan di klima. E partisipantenan a mira, entre otro, un ‘Climate Emotions Wheel’, ku ta mustra emoshonnan ku ta varia di miedu, impotensia i tristesa te na speransa, kompromiso i motivashon. Tambe a usa e siklo di duelo di Kübler-Ross pa mustra kon hende por reakshoná riba informashon ku tin un impakto grandi.

Ken mester aktua?

E último fase a drei rondó di e pregunta: ken ta responsabel pa trese kambio? Den esaki, siudadanonan, empresanan i gobièrnu a ser presentá komo tres partido ku ta konektá ku otro.

E idea tras di e tayer ta ku responsabilidat pa maneho di klima no por ser poné solamente riba konsumidónan individual, pero tampoko eksklusivamente riba gobièrnu òf sektor empresarial. Tur tres tin un papel den e proseso di kambio.

Tambe a trata e repartishon desigual di emishon mundial. Segun e material edukativo ku a ser usá, e dies porshento di poblashon mundial ku ta mas riku ta responsabel pa aproksimadamente mitar di e emishon di CO₂ relashoná ku konsumo, miéntras ku e mitar mas pober di poblashon mundial ta kousa un porsentahe hopi mas abou.

Konteksto di Kòrsou

Pa Kòrsou, e diskushon ta unu hopi konkreto. Un klima mas kayente ta afektá nos isla, entre otro, pa medio di kalor mas ekstremo, preshon riba suministro di awa potabel, mas demanda pa elektrisidat pa fria, deterioro di refnan di koral i riesgonan pa áreanan di kosta.

Na mes momento, Kòrsou mester hasi eskoho tokante e transishon for di kombustibel fósil pa, entre otro, energia di bientu i solar.

Ta presis e konekshon ei ku ta hasi e modelo di Climate Fresk útil. Un tema manera oumento di temperatura no ta para riba su mes, sino tin efekto riba uso di energia, awa, salú, naturalesa i ekonomia.

Segun e presentashon, mas ku 2,3 mion hende den 170 pais a sigui Climate Fresk te awor, i e método ta disponibel den mas ku 45 idioma. E método a ser desaroyá pa e ingeniero franses Cédric Ringenbach i ta ser usá mundialmente pa edukashon i entrenamentu tokante klima.

E seshon na Kòrsou tabata forma parti di un seri di enkuentronan di Climate Fresk riba e isla. Pa e enkuentro spesial pa media, a selektá un grupo chikí di periodista, kompletá ku studiantenan di Club 17 di University of Curaçao. I e tayer tabata den man di Abir AlMajrafi i Aisha Al-Balushi, tur dos di Oman.

potrètnan

Riba e kombinashon di potrètnan por mira momentu di e interakshonnan durante di e tayer di e Master Class Climate Fresk.