WILLEMSTAD.-  Ayera fiskal Hato- Willems a hasi demanda di  e sistema di máksimo di TBS òf 22 aña di kastigu di prizòn pa e hòmber  Geraldino Martiena (53) akusá di ta esun ku a asesiná  Alwin Bremer ku a keda hañá morto na Baya Beach dia 29 di yanüari último. Martiena ta insistí ku e no tin nada di aber ku e kaso.

El a bisa ku e dia ei, el a kue bùs i bai St. Cruz pa bai landa. E víktima a bah’é na kas i bai ku e vehíkulo di hür.

Fiskal a duna di konosé ku a haña  rastro di DNA di Martiena bou di uñanan di e víktima.

Tambe a haña rastro di sanger di e akusado parti paden di e karson di e víktima.  A haña  tambe rastro di sanger di e víktima den vehíkulo Kia.

Segun fiskal for di 2005 te ku 2017 e akusado tabata bou di tratamentu di e sentro sikiátriko Pieter Baan Centrum na Hulanda.

Dia 19 di òktober 2002 Martiena a asesiná su pareha i na  2003 el a keda kondená i a sinta  7 aña largu den un prizòn na Bèlgika  bou di e sistema di TBS.

Segun fiskal mas aleu akusado ta sufri di  perturbashon personal (persoonlijkheid stoornis) i tin un dosié di e instituto  di 164 página.

Dia 17 yanüari 2019 el a yega Kòrsou. For di e fecha ei te ku dia 29 di yanüari, Martiena tabata keda serka Bremer.

E akusado a atmití ku e ku Bremer tabata droga nan kurpa i bebe alkohòl.

Fiskal a bisa ku e akusado mester haña un kastigu basta largu òf e sistema di TBS kombiná ku kuido  serio.

Mirando esaki Fiskal Hato- Willems  a hasi un demanda  di TBS máksimo òf 22 aña di prizòn pa  Martiena. Hues lo tuma desishon aki 3 siman.