WILLEMSTAD.- E closer yu di Kòrsou di Los Angeles Dodgers Kenley Jansen, a bisa ku e ta sintiendo su mes mas fuerte kada siman pero ku te ainda e ta sinti efektonan di coronavirus. Loke mas e malesa a afektá ta su kondishon ya ku e sa sufri di rosea kòrtiku despues di un luna pasá a kombatí e vírus. “Pa tur e lunanan ei bo ta traha asina duru i despues bo tin ku wanta ku tur kos pa dos siman. Te ainda mi ta tratando na yega 100% bèk. Debidamente e ta traha ku bo kurpa. No ta un malesa ku bo tin ku hasi wega kuné”, asina Jansen a deklará durante un konferensia  di yamada. Tantu Jansen i su dos yunan, a tèst positivo pa e vírus na yüni kual a pone ku nan mester a keda den karentena na kas. Dia 12 di yüli el a raportá na trainingcamp  despues di a pèrdè nuebe seshon di práktika na Dodgers Stadium. Djárason último e yu di Kòrsou a permití su promé kareda den seis aparishon durante e temporada aktual i te ainda el a salba tur kuater partido ku el a haña oportunidat pa salba. Tur esakinan ta bin apesar ku e velosidat riba su cuitter tin un averahe di solamente 91 mia pa ora. Ta un bahada for di e averahe di 91.7 mia pa ora durante kampeonato 2019 i 93 pa 94 mia pa ora durante su komienso di su karera. Mènedjer Dave Roberts a indiká ku e no ta preokupá ku e velosidat. E ta haña ku e dominio di Kenley ta mihó kompará ku aña pasá i ku e ta kontentu ku e closer tin bon prestashonnan. Pa loke ta Jansen, e efektonan mas malu ku el a sufri di e vírus ta hopi doló di kabes, doló den pechu, keintura, falta di energia i ku doló rònt kurpa. Awor ku e ta kasi rekuperá kompletu, el a bisa ku e ta siguiendo e protokòlnan di salú i siguridat, ya asina e no ta bolbe haña  e vírus atrobe.

LAGA UN KOMENTARIO

Please enter your comment!
Please enter your name here