WILLEMSTAD.-Manera ya ta konosí, pa algun siman kaba Sentro di Detenshon i Korekshon Kòrsou tin problema ku  IT. Esaki despues ku dia 29 di yüni último, henter e sistema a bai plat. Gerensia di Prizòn a saka un komunikado bisando ku un vírùs lo ta  kousa di e problema ariba menshoná. Di informashon ku EXTRA ta disponé di dje, ta indiká ku e situashon aki a bira hopi frustrante pa trahadónan di prizòn ya ku nan no por hasi nan trabou optimalmente paso niun kòmpiuter i programa no ta funshonando. P’esei a aserká na sindikato pa ku e situashon aki. Segun EXTRA a komprondé, loke a resaltá den e problema aki, ta ku e dama enkargá ku IT di prizòn no por solushoná e problema. Trahadónan a indiká ku tin un personal mas di IT ku si ta kapas pa solushoná e problema, ku tin 3 siman kaba sin ku nan por keda kla.

Tambe di informashon ku EXTRA ta disponé di dje, ta indiká ku e dama IT ta kana insultá i menasa tur personal di prizòn ku lo kita tur akseso di internèt for di nan pa nan no subi ningun media sosial, tur esaki ku protekshon di su hefe den Tim di Maneho di SDKK.

Den transkurso di dianan binidero, EXTRA lo bai tuma kontakto ku direktor di e instituto señor Urny Floran pa haña su reakshon, pa wak ki ta su posishon den e problemanan ku el a bin enkontrá, despues ku el a bin for eksterior.

SDKK tin vários problema manera e.o. kasonan di COVID, “hacking” di e sistema di IT i alabes lo puntr’e tambe si SDKK tin sufisiente medio finansiero pa sigui paga e supuesto ekspertonan di IT ku ya pa di 3 siman ta bini na prizòn sin por solushoná e problema di IT den e instituto.