WILLEMSTAD.- Un kantidat di reakshon EXTRA a haña e dianan aki, for di siman pasá ora a keda anunsiá ku Giro Bank ta den su fase final. Alabes a bisa tambe ku ta buskando un salida pa e klientenan di Giro Bank ku tin nan plaka wardá einan no keda perhudiká.

E situashon di Giro Bank ta kos di yora, tabata algun di e reakshonnan. Ta un ‘free for all’ tabatin, partimentu di plaka, amigunan tabata haña fiansanan mionario ku un prosedura kompleto for di regla, direktor (eks) tabata duna trahadónan sèn pa kualke feneta ku nan hasi. I nos ta papia di hopi pero hopi plaka ku a dispidí, plaka di spardónan i empresanan chikí ku awe ta perhudiká.

Gobièrnu a anunsiá algun siman pasá ku ta yegando na un solushon pa e spardónan di Giro, pero segun e reakshonnan ku EXTRA a haña ta bisa ku un biaha mas tin di fia sèn pa paga spardónan nan sèn.

I miéntras tantu tin un grupito ku a djòdjò ku e plaka di Giro ku awe ta kana liber. Tin ku a fia plaka, miónes i negoshi a bati bankarota. Awe e mesun personanan aki ta sigui representá interesnan di gobièrnu den konsultantnan. Kon por ta, segun e diferente reakshonnan ku EXTRA a haña ta bisa.

I miéntras tur esaki ta sosodiendo, esun ku mester a supervisá Giro Bank, esta Banko Sentral tabata kompletamente na soño. P’esei algun di e reakshonnan ku EXTRA a haña ta bisa ku ta inkomprendibel ku awe e mesun eks presidente di Banko Sentral tin e kurashi di sali i papia kiko a bai robes na Giro i kiko lo mester a hasi. E no tin di mustra dede riba otro pero e tin di wak riba su mes,  ta reakshon di siudadanonan rabiá ku e kaso di Giro Bank aki.

I awe atrobe ta pone un debe riba pueblo pa por duna spardónan nan sèn bèk. I miéntras tantu esnan ku a gosa di plaka di Giro Bank, ketu bai ta gosa di plaka di pueblo. Esaki no por! Tabata e reakshonnan ku EXTRA a risibí.