Teatro KadaKen ta estrená “Chakutoe” riba Dia Internashonal di Teater

WILLEMSTAD.- Dia 27 di mart 2019, Dia Internashonal di Teater, Teatro KadaKen ta estrená su obra Chakutoe na La Tentashon. Chakutoe ta un obra di krítika sosial di un periodo den historia di Kòrsou ku no sa haña masha atenshon. Tumando e wèlga di den haf na 1922 bou di guia di Felix Chakutoe komo punto di salida, e obra ta trata algun tema universal den un kuadro históriko, sosial i kultural.
Chakutoe ta hiba bo bèk na e Kòrsou di 1922. Haf di Kòrsou tabata den bonansa i e gruponan di poder tabata prinsipalmente interesá den kresementu di ekonomia, defendiendo interes di e kompanianan di barku. Pero e situashon a bira eksplosivo, ora e kompanianan a redusí salario di e trahadónan di haf drástikamente.
Nos ta biba e historia mirando kondishon di bida di famia Hendriksen-Schilder. E yu hòmber Tirso ke ta un lider. Hesus i Tula ta su inspirashon, e gusta lesa i resa, pero e no por logra di haña su mes kaminda. Ora su ruman muhé Magdalena mustra di ta un lider real, Tirso ta hañ’é ta skohe … E ta konform’é na norma di sosiedat, òf e ta sigui su propio bos interno?
Gibi Bacilio, ku tin un trayektoria largu den teater na Kòrsou a skibi i dirigí e obra akí. Bacilio ta demostrá su maestria lagando e aktornan hunga diferente personahe, dunando nan chèns di mustra nan diferente talentonan. No solamente aktor ku mas eksperensia manera Norma Cova i Albert Schoobaar, pero tambe esnan mas hóben, Tisjaira Martina, Guenn Ramon Gustina i Roley Kelkboom ta demostrá esaki.
Teatro KadaKen ta konosí pa su obranan profundo i impaktante. KadaKen ta spera ku su públiko ke wak Kòrsou su historia den kara, sakudí kita karga for di su lomba, tuma responsabilidat i no tapa kara pa bèrdat, pa duru i doloroso ku e por ta. Chakutoe ta e di seis obra di Teatro KadaKen ku ta sigui despues di su éksitonan MULA (2017), Bos di Nos Pueblo (2015-2016), Balada di Pluisje (2013-2014), Tisha (2012) i E Dekonstrukshon di Edsel K. (2009).
Chakutoe ta estrená riba Dia Internashonal di Teater, 27 di mart 2019, 8.00 or anochi. Asin’aki Teatro KadaKen ke suprayá importansia di teater pa un sosiedat. Sigur pa Kòrsou ku mas i mas ta choka teater komo disiplina di arte, pa motibu ku no tin un podio struktural i duradero p’e. E lema ‘Mi mester tene e kandela bibu’ di Felix Chakutoe di 1922 pa Teatro Kadaken ta konta pa teater na Kòrsou tambe.
Banda di presentashon pa públiko en general Chakutoe ta presentá pa skol sekundario tambe, kompañá pa un programa edukashonal. E obra ta apropiá pa adulto i hóben for di 12 aña i ta posibel danki na Prins Bernhard Cultuurfonds Caribisch Gebied, Fonds Podiumkunsten i BankGiro Loterij Fonds. Chakutoe ta na papiamentu i pa esnan ku mester tin un resúmen na ingles disponibel.
Ta bende karchi pa Chakutoe pa ANG 27,50 na Mensing’s Caminada, Van den Tweel Zeelandia i online: https://bit.ly/ChakutoeTixx.
Despues di estreno na La Tentashon ta sigui funshon dia 5,6 i 7 di aprel, despues dia 3,4 i 5 di mei 8.00 or di anochi i riba djadumingu 5.00 or di atardi. Pa mas informashon: teatrokadaken.org òf yama 569 8417/510 2368.

SHARE

LEAVE A REPLY