Update: Curoil ta refutá ‘fake news’

Den un reakshon e kompania Curoil ta refutá informashon eróneo ku ta sirkulando riba retnan sosial den kual ta bisando ku Curoil lo ta responsabel pa e problema di Aqualectra ku suministro di koriente. Curoil ta enfatisá ku nan ta responsabel pa suministro di kombustibel i esei no tin nada di haber ku koriente. Curoil ta sigui bisa ku nan ta den kontakto ku Aqualectra pasobra Curoil tin sufisiente kombustibel pa suministrá na e kompania.

Update: Skolnan ta sera tempran debí na situashon koriente

Informashon ku EXTRA a kaba di risibí ta indiká ku Ministerio di Enseñansa i Edukashon, Siensia i Deporte ta informá ku skolnan di fundeshi ta kaba 12’or di mèrdia miéntras ku skolnan avansá ta kaba 11’or. Pa mayornan tene kuenta ku e kambio aki. Ademas tene kuenta ku lusnan di tráfiko ku no ta funshoná pues tur outomobilista kore ku e koutela nesesario i pasenshi.

WILLEMSTAD.- Despues ku for di ayera sierto barionan a kuminsá sinti e problemanan ku koriente, awe ta hinter Korsou a keda sin elektrisidat. E kompania di utitilidat Aqualectra ta informá ku su téknikonan ta hasiendo esfuerso máksimo pa logra restablesé koriente na Korsou.

Te na e momentunan aki no a logra detektá e orígen di problema i pa asina por traha riba restorashon di suministro di koriente.

E kompania ta sigui informá ku ainda no por duna informashon fiho tokante e durashon di e blackout aki tampoko. Keda pendiente asina ku EXTRA ta disponé di mas informashon nos lo suministrá esei.