...Solushonnan ku medisina virtual òf tambe Tele Medisina ta tresiendo mundialmente ta di vital importansia, kaminda dòkternan den e tempu aktual ta karesé di ekipo, kostonan haltu i defisiensia den komunikashon den salubridat. Pero e bon notisia ta ku Medisina Virtual, ku den pasado nos a mira den pelíkulanan futurístiko, a pisa suela di Kòrsou. Dòkter Richard Visser, eksperensiá den medisina virtual a bin Kòrsou, den estrecho kolaborashon ku Benu Pharmacy i Visser Trading. I el a duna un charla na Avila Beach Hotèl, ku tabata yen yen. Esaki ta un indikashon ku e interes ta enorme.

Inovativo i nobo

Dr. Visser den entrevista ku EXTRA a splika ku medisina virtual ta algu inovativo i nobo. E ta bibando na Oropa i einan e ta keda desaroyá. E ta den proyektonan no solamente na Oropa, pero na Medio Oriente, na Turkia, sùit Afrika i diferente lugá mas. E idea ta kon por krea akseso pa hendenan manera nos, na spesialista. No solamente e islanan aki pero na diferente otro pais, hendenan no tin akseso fásilmente na dòkter, spesialista, enfermeranan. Esaki pasobra tur spesialista hopi biaha ta aglomerá den sentronan grandi, siudatnan grandi rònt mundu. Pafó di e siudatnan ei bo no ta haña e spesialistanan, e kuida ta bira un nivel mas abou. E idea ta ku e teknologia di Cloud ku tin i kombiná ku teknologia selular por trese ku un dòkter por wak un pashènt di leu, i hasi tur kos ku e ta hasi den su ofisina pero for di distansia.  Esaki ta loke nos ta yama Tele Medisina.

Chekeo kompleto di forma virtual

“I nos ta hopi leu. Nos ta asina leu ku e dòkternan riba nos sistema por hasi un chekeo kompleto, por wak tur kos di e pashènt, hasi diagnóstiko i asta manda rèspèt digital. Esaki nos ta usando den diferente sistema di sistemanan di seguridat priva, Hendenan ku por biaha ku nan dòkter den nan telefòn. Hopi bia bo ta biaha den un pais bo no sa e lenguahe bon i si bo tin bo app ku ta konektá bu ku bo dòkter. Bo informashon digital por tei den algun sekònde. Tur informashon, e otro dòkter por haña pa komuniká ku bo dòkter”, segun e splikashon di dòkter Visser. I tur esakinan el a bisa, ta ehèmpelnan kaminda e sistema di Tele Medisina ta keda usá. Na Kòrsou i e islanan aki banda e ta sumamente interesante, pasobra aki mester di mas komunikashon entre e dòkternan i spesialistanan den eksterior ku ta traha kuné. Ku e sistema aki por monitòr e hende grandi for di distansia. E enfermera por komuniká ku e dòkter i hasi chekeo riba e pashènt i e pashènt no tin mester di bai ofisina. Tur kos ta keda hasí di forma ‘control remote’.

Mas akseso

Kòrsou ta biniendo ku hospital nobo i si ke pa e hospital nobo aki tin un efekto muchu mas grandi riba nos hendenan, ta netamente e sistema aki mester kaminda por bai kas mas lihé for di hospital i ta keda kuidá for di kas mes. Ta un monitòr ku por sosodé for di kas. E ta habri mas opshon pa pashèntnan kaminda nan por haña segundo opinion i e pashèntnan asta por keda Kòrsou mes i problemanan ta keda solushoná ku e dòkter den eksterior. E lo sòru tambe pa baha gastunan di manda pashèntnan eksterior pa tratamentu médiko i ta bai kapasitá e sistema médiko aki. E lo nifiká hopi pa e sistema di turismo tambe i prinsipalmente awor ku Kòrsou ta kanando ku pasonan gigantesko den desaroyo di turismo. Pa e turista tambe esaki lo nifiká hopi pasobra nan no por papia papiamentu i ulandes i un di nan strès ta e sistema medisina di e isla. Si e pashènt aki por bula ku su dòkter den su telefòn, ku un app e ta sintié ku e tin su dòkter aki nan. E turista aki lo biaha mas i lo biaha ku mayornan ku tin kisas malesa króniko pero e ta sintié safe. E dòkter aki por papia kuné i komuniká ku su spesialista. Tur esaki ta opshonnan pa Kòrsou.

Na otro islanan por asta hür ekspertisio for di Kòrsou ku e sistema nobo kaminda ta kombiná Cloud compuiting. Dr Visser ta kana ku su hospital den un maleta. E por habrié unda ku ta na mundu i komuniká ku Wifi òf selular i buska un dòkter kualke parti di mundu i hasi e chekeo kompleto riba e pashènt. Por hasi tur sorto di skèn, kardiólogo i  hopi mas i ta duna e resultado mesora. E dòkter na e otro banda ta dirigí e chekeo kompleto.

Gobièrnu ta entusiasmá

Ta trata di algu nobo na Kòrsou i dr Visser ya a aserká gobièrnu na Kòrsou. El a bisa ku nan a sera konosí ku gobièrnu di Kòrsou ku a demostrá di ta hopi entusiasmá. Mester determiná kon ta bai trata ku e sistema aki den fase. Mester envolví entre otro SVB. E sistema aki ta bin sea ke òf no. Na Oropa a pone ku e ta drenta na aña 2020. Dòkternan mester siña kon ta traha ku e sistema. I  pa e islanan chikí aki e ta importante pasobra aki semper tin di traha ku paisnan grandi manera Ulanda i Colombia. I ku un sistema asina aki ta manera den ofisina mes e spesialista ta.

Vera Health Group

Dòkter Richard Visser tabata minister na Aruba. Den su último aña el a kuminsá traha ku un grupo di hospital grandi na Merka i nan a kuminsá ku e sistema pa usa Tele Health pa nan kuido intensivo i tabata eksitoso kuné. Nan tabatin bunker pafó kaminda 7 dòkter tabata funshoná 24 ora pa dia ku un grupo di enfermero i ta monitor 8 pa 9 hospital. Manera algu pasa ku e pashènt mesora e dòkternan aki ta atendé. Ta papia ku e pashènt i ta disidí ken ta bin i tin biaha niun hende mas mester bin pasobra nan mes ta atendé. Ku e sistema aki e sifra di mortalidat a baha i salu a subi. I dr Visser a kuminsá traha ku nan na Aruba pa trata kanser. E tabata un sistema hóben i ta for di einan el a disidí di bai den e direkshon ei. El a bai Merka, despues sigui pa Oropa i a forma nan grupo di Vera Health Group. E aña aki tin proyektonan grandi na Oropa, Saudi Arabia, Turkia.

Dr Visser a bisa di a hasi esaki pa e islanan i el a bisa ku un dia e ta bai bèk su isla i yuda. Den medisina esaki ta e loke ta bai trese kambio. E lo bai kambia e akseso ku pashèntnan tin na medisina i dòkternan.

Skapa gastu

I ta masha importante pa menshoná ku e sistema Virtual aki lo trese bahada den gastunan médiko. E ta un sistema masha efisiente i lo skapa masha hopi plaka. Lo por spera riba hendenan ku ta manda afó, e spesialista ku tin di bula bin, konsultantnan. Spesialistanan por traha libremente ku otro i desaroyá un medisina mas avansá i mas aksesibel pa nos poblashon.

Pa loke ta Kòrsou, dr Visser a bisa ku nan ta kla pero tin di sinta ku gobièrnu i tur partner pa traha un plan kon ta bai introdusié. E ta kere ku lo ta great ku teniendo na kuenta ku ta bin hospital nobo i awor bin ku e sistema revolushonario aki. E lo sòru pa e hospital nobo traha hopi mas mihó di loke hopi a keda ku e por traha. E ta duna mas posibilidat na e dòkternan pa wak mas pashènt, mihó kuido na pashèntnan tambe. Ta un sistema kompliká pero ora traha kuné ta mira kon fásil e ta. E ta manera un Iphone ku ta kompliká pero asina kuminsá traha kuné, ta mira kon fásil ta.

Dòkter Visser ta kere ku den futuro lo bai tin mas charla. E charla e siman aki na Kòrsou tabata yen yen. Pero dòkter Visser a bisa ku si e haña un yamada di Kòrsou e lo tei mesora pa asesorá.

Inovashon den medisina

Tele Medisina lo trese kambionan. Manera e mundu a kambia ku selular, facebook, Internet. Tur e inovashonnan aki ta bai awor tambe den medisina. Medisina ta poko mas kompliká i ku mas seguridat kon ta hasié. Awor ta bai era nobo di medisina kaminda por konektá ku tur spesialista rònt mundu, mira pa un ‘second opinion’ ku ken ku nos ke. E no tin limit’é. E úniko límite ta nos mes. E ta trese ménos gastu pa gobièrnu, un bida mas mihó, enfermeronan ta bisa “super nurse” pasobra nan por hasi hopi mas pa e pashènt. Dòkternan mes por kapasitá nan mes ku nan koleganan di afó. E posibilidatnan ta hopi i al final e punto ta ku e ta un teknologia ku lo benefisiá e pashènt mas ku otro teknologia ku tin. E ta duna e pashènt akseso na kuido ku tabata difísil pa haña.