WILLEMSTAD.- Palasio di Hustisia mihó konosí komo 21 trapi, ta un di e sitionan kaminda ménos ta spera aktonan di ladronisia ta tuma lugá.

Esaki mirando ku e seguridat ta altísimo i tin kontròlnan severo  ku ta keda hasí dor di miembronan di LBD i tambe kuerpo polisial, pa un i tur ku ta subi bin ariba  pa un motibu òf otro.

Ayera un suseso insólito a tuma lugá den e edifisio, kaminda un hues ku ta trata kasonan penal, a bai baño i a lubidá su telefòn.

Na momento ku el a kòrda i a bai pa buska  e loke ta  di dje ku siguransa, a dal den duru pa motibu ku e telefòn a disparsé den un frakshon di sekònde.

Esaki sigur a laga tantu e hues komo tur hende keda  babuká, pa motibu ku algu asina no ta di spera den e edifisio  ei.

Mirando e akto baho  aki, por tuma nota ku hende a bira sin kunes i no ta importá ku e ta den un edifisio kaminda netamente pa aktonan asin’aki hende ta risibí kastigu, pero ta opta pa hòrta kos ku no ta di nan.