Despues di intervenshon di STO:

WILLEMSTAD. - Den un komentario fórmula pa redakshon di EXTRA, Presidente di Sindikato Transporte Optimalisá (STO), Giovannie Decaster a duna di konosé ku despues di mas di tres luna ku e telefòn ku tin na Parada di Taksi na Otrobanda, ku no tabata den funshon, for di ayera e telefòn ta den funshon atrobe.

Na opinion di Decaster, e loke ku ta remarkabel, ta e echo ku semper e sindikato di taksi, Sinusta a bisa ku ta nan ta manehá e telefòn ku tin na e parada di taksi na Otrobanda. Pero ora ku un taksista a aserká Sinusta pa wak kiko por hasi pa e telefòn ta den funshon bèk, keriendo ku e telefòn en bèrdat ta bou di maneho di Sinusta, e sindikato aki lo a notifiká e taksista pa e aserka STO, pa motibu ku e taksista en kuestion ta miembro di STO.

Esaki e taksista na su turno a hasi esei tambe i a aserká STO pa wak kiko por hasi pa solushoná e problemátika di telefòn ku tin na e parada di taksi aki.

...Number di telefòn 462-3621...

Decaster a tuma akshon mesora pa buska solushon pa e telefòn ku ya tin algun tempu for di servisio. E telefòn ta nesesario, no pa solamente turistanan ku yama por haña un taksi, pero tambe pa komunidat ku por yama i haña un taksi den e área di Otrobanda pa nan destino.

Pues si e telefòn ta den funshon, e ta bon pa tur taksista, sea ta di miembronan di kualke sindikato ku por ta.

Decaster a wak e aspekto ei komo un aspekto pa e taksista ta bon sirbí pa nan por haña nan kareda, prinsipalmente den e tempu ketu aki.

Pero e taksista nan ku a aserká Sinusta a haña un rechaso, pa motibu ku nan a skohe STO komo nan sindikato. Decaster ta di opinion ku e telefòn no ta pa STO ni Sinusta, pero ta pa tur taksista.

Manera menshoná, Decaster a sòru pa e telefòn ta funshonal i ta hasi un yamada na pueblo di Kòrsou ku mester di un servisio di taksi for di den e área di Otrobanda, por hasi uso di e number di telefòn 462-3621 pa por haña servisio di taksi.

E taksita nan ku ta para na e parada aki, ora e telefòn yama, nan por haña kareda p’asina nan por haña entrada.

STO no ta traha solamente pa su miembronan pero ta traha pa tur hende ku ta traha den sektor di transporte públiko i inkluso taksista nan.

Ta pidi pa kuida e telefòn di manera ku tur taksista por hasi uso di dje.