WILLEMSTAD.-  Korte di promé instansia a trata e kaso ku  a haña e nòmber Palki. Ta trata  di e hayasgo enorme di basta kilo  di koka i heroina,  arma i munishon, ku polis a deskubrí den un pikòp riba kaminda di Bándabou dia 8 di yüni último.

Ta trata di un kantidat di 94330 gram  di koka, mas 8310 gram di heroina  ku a suma un total di 102640 gram di droga.

Tambe polis a konfiská 11 arma di kandela (5 pistol i 6 revòlver), 6 kashi di bala bashí i 465 munsihon.

Tur e 3 akusadonan a presentá den  sala di korte pa nan kaso keda tratá.

Ministerio Públiko ta akusá Humberto Salazar (45) nasé na Colombia, Williams  Chavez Lugo (32) nasé na Venezuela i Haitham Hammoud Osorio (28) nasé na Colombia komo esnan responsabel pa e merkansianan.

E akusado Salazar a bisa ku tur loke ku polis a konfiská ta di dje.

El a duna di konos’é ku el a bai hasi un hende fabor. El a splika ku el a pidi Hammoud pa ban kuné i dal un rònchi na Bándabou. Segun Salazar Hammoud no tabata sa nada.

Pa loke  ta trata e akusado Hammoud el a hasi uso di su derechi keda ketu.

E akusado Chavez Lugo a splika ku el a kaba yega for di un lancha ilegal i tabata skondí den mondi.

El a mira e pikòp pasa i a pidi un left sin sa kiko tabatin den e pikòp.

Fiskal a duna di konosé ku e boto a sali for di Venezuela mainta tempran i yega Kòrsou den e bahia ku ta ser yamá Palki na plantashon Patrick na Bándabou.

Segun fiskal e hòmber ku tabata na bordo i a baha ku e kargamentu tabata Chavez Lugo.

Su telefòn a muha i no por a komuniká ku Hammoud ora ku el a yega.

Fiskal a bisa  ku Hammoud tabatin kontakto delantá ku Lugo pa ku e transporte aki.

Durante transporte tantu Straker ku Salazar tabata vigilá sea helikòpternan, avion òf e botonan di wardakosta bou di òrdu di Hammoud.

Fiskal a sigui relatá ku manera Hammoud a haña yamada for di un otro number venezolano ku a yam’e informe ku e kargamentunan a yega tera i ku e telefòn di Chavez no ta trahando, el a sali mes ora pa buska e kosnan.

Hammoud ku Salazar a sali huntu den e pikòp, miéntras ku Straker a bai riba su ‘crosser’  pa djòin e tim pa bai buska Lugo Chavez i e kargamentu.

Mas aleu fiskal a sigui relatá ku polisnan a konfiská telefònnan di kual nan por a mira kòmbersashonnan i tambe fotonan ku a keda mandá pa mustra unda Chavez  lo a depositá e kargamentu.

Tur kos a kuminsá ora ku bisiñanan atento a yama polis pa posibel ilegalnan ku a yega tera.

Mesora e patruya ku a yega na e sitio a topa ku Straker riba su crosser, pero a lag’é bai pa motibu ku e no tabatin indikashon di ta un ilegal. Djis tras di Straker nan a topa e pikòp  biniendo ku 3 hòmber aden huntu ku e droga i e arma nan.

Fiskal a duna di konos’é ku e akusadonan ta ser konsiderá komo kómplise. Nan tabata sigui instrukshon nan di Hammoud i mester a bai buska Chavez.

Segun fiskal e echo ku Straker no tabatin nada riba dje, no ta hasié inosente, pa motibu ku e tambe tabata esun ku mester a sòru pa saka e droga fo’i mondi.

Na hues komisario Salazar a bisa ku el a wòrdu aserká pa un kargamentu di droga i  ku nan lo a page 10 mil florin.

Straker a bisa ku e tabata den mondi bèrdat pero pa tèst e crosser.

Fiskal a haña e akusashonnan proba i a demanda Hammoud na 7 aña komo e organisadó di e transporte, Chavez Lugo na 6 aña, Salazar na 5 aña i  Straker na 5 aña.