E situashon na Haiti, despues di e temblor ku a dal e pais aki den oranan di awe mainta, ta birando ora pa ora unu di desesperashon. E kantidat di daño material ta grandi i loke ta mas tristu ta e kantidat di mortonan. Agensianan di notisia internashonal ta indiká ku ya kaba a surpasá e kantidat di 225 morto, anto ainda tin míles di hende herida i no papia mes di tur esnan ku ta pèrdí.

E promé temblor a registrá 7.2 riba eskala di richter i e shòknan despues a registrá forsa di 4.1 i 5.2 riba eskala di richter tambe. Pues ta un temblor hopi fuerte kombiná ku shòknan bastante fuerte.

Tur kos ta indiká ku e daño di mas grandi ta na parti sur di e pais. Segun krus Kora Internashonal e daño mas grandi ta na kasnan i tambe infrastruktura. E sistema di telekomunikashon tambe a kai afó kompletu. Diferente pais a ofresé Haiti yudansa kaba entre otro Merka.

Temblor fuerte a dal Haiti

WILLEMSTAD.- Servisio Meteorológiko a anunsiá ku na Kòrsou a emití mensahe kódigo hel relashoná ku un temblor na Kòrsou. A indiká ku un temblor a tuma lugá pero e no tin e potensia pa generá Sunami na Kòrsou. Despues Meteo a emití un mensahe di prekoushon pa laman brutu pa e kosta nort i ost di Kòrsou. Meskos a sigui atvertensia pa kalor eksesivo na Kòrsou. Despues di un ratu a kanselá e atvertensia di laman brutu. Te na e momentunan aki di mèrdia por tuma nota ku na parti ost di nos isla por skucha bos ounke sin nada áwaseru.

Den Karibe tin situashon di kalamidat serio na momentu ku un temblor sumamente fuerte a dal Haiti.

E promé informashonnan ta indiká ku e temblor a dal Haiti hopi duru. A registrá un forsa di 7.2 riba eskala di richter loke ta kalifiká pa un temblor hopi severo. Ya kaba tin indikashon ku por lo ménos 29 persona a pèrdè nan bida, asina outoridatnan di Haiti ta informa.

Institutonan sismológiko den e área ta indikando ku por spera gran kantidat di víktima i banda di esei daño material sumamente grandi den e pais. Manera por a spera tin hopi foto ta sirkulá di situashonnan sumamente tristu na Haiti. Segun informashonnan, e episentro di e temblor ta situá na 8km di Petit-Trou-de-Nippes na 150 km di e kapital Port-au-Prince.

Un instituto merikano a indiká ku for di Hawaii a registrá alerta pa olanan ku altura di mas ku 3 meter, pero e menasa ei no tei mas. Tantu Cuba komo Jamaica i pais bisiña Repúblika Dominikana a sinti e temblor. Ya kaba timnan internashonal di Krus Kora a yega Haiti pa brinda nan asistensia.

Algun aña pasá tambe un temblor fuerte a dal Haiti i e tempu ei Kòrsou a pèrdè dos profeshonal den aviashon señornan Francisco i Isenia.