Meteo Kòrsou vigilando desaroyo na Puerto Rico

WILLEMSTAD.-Manera EXTRA a informá un ratu pasá, un temblor un tiki mas fuerte ku esnan anterior a kousa basta spantu na Puerto Rico awe mainta. E situashon ta motibu di mas preokupashon debí ku ya kaba ta basta temblor tabatin na Pto.Rico último simannan. EXTRA ta den kontakto estrecho ku servisio di Meteo di Korsou. ‘Aki nos ta vigilando e situashon hopi djaserka, sigur debí ku ta vários temblor tabatin. Ta vigilá pasobra ta ora e magnitut di e temblor na Pto. Rico yega 7 òf mas riba eskala di Richter ku e ta bira di importansia pa e islanan aki banda”. Na palabra dr. Albert Martis direktor di Meteo Korsou.

Martis ku ta den kontakto direkto ku e direktor na Pto. Rico a duna di konosé ku e situashon riba e isla a bira asina preokupante te ku e direktor di e instituto di Meteo mester a bai serka e gobernador pa splika dikon tin tantu temblor asina e momentunan aki.

Korsou ta siguiendo e desaroyonan hopi di aserka. E ta un fenómeno ku ta surgi for di fondo di laman i ta bon pa enfatisá ku esaki no tin nada di haber ku kambio di klima. Martis a sigui splika ku nan ta vigilá pa wak si e magnitut di e temblornan ta oumentá den intensidat.

Meteo Korsou ta sigui den su kontakto ku Pto.Rico pa haña mas informashon di loke ta pasando i tambe pa interkambio di informashon. Tambe lo informá komunidat di Korsou ku informashon korekto di loke ta pasando.

E dianan aki Korsou tin un wer dushi, ku un poko áwaseru. Martis a splika ku nos ta na final di e temporada di áwaseru. Meteo ta pronostiká ku pa febrüari i mart ta bira mas seku.

https://extra.cw/otro-temblor-awor-di-6-5-di-magnitut-a-sakudi-puerto-rico-awe-marduga/