Durante e luna di sèptèmber nos ta bai nota ku ta hasi mas kalor i ku e wer lo ta mas kayente. Servisio Meteorológiko Kòrsou (Meteo) ta indiká ku esaki ta pa motibu di e temperatura ku ta mas haltu ku normal pa e periodo di aña ku nos ta den. Den e temporada aki tambe bientu lo ta mas suak. Ora ku bientu ta mas suak, nos kurpa no ta refreská sufisiente. Esaki ta pone ku nos ta sinti mas kalor i sofoká.

E kalor asin’aki por tin un impakto riba salú di hende. E por okashoná ‘zonnesteek’ i òf fatiga. Síntomanan ku nos por sinti ta hopi kansansio, un kalor ekstremo, kram di múskulo, difikultat pa hala rosea, iritashon riba kueru, biramentu di kabes, walmentu di stoma repentino ku por hiba na sakamentu. Malesa di preshon haltu i kurason ku no ta funshoná optimal por keda afektá dor di e kalor eksesivo. Asta e situashon por kondusí na atake si un persona hasi aktividat físiko den kayente òf keda den kalor pa largu tempu.

Ministerio di Tráfiko, Transporte i Planifikashon Urbano, kual Meteo ta forma parti di dje, huntu ku Ministerio di Salubridat, Medio Ambiente i Naturalesa ta urgi tur hende pa bebe sufisiente líkido preferiblemente 2 liter di awa pa dia durante e dianan mas kalor aki di aña. Usa protekshon solar pues artíkulonan pa tapa solo manera pèchi, sombré, parasòl i brel di solo pa protehá e wowo. Tambe ta rekomendabel pa usa paña ku tin kolonan kla i di material natural manera por ehèmpel tela di katuna i lenen pa mantené e kurpa mas fresku. Evitá kos di bebe ku hopi suku aden i evitá di sali i keda largu den solo si no ta nesesario.

Nos no por prevení kalor eksesivo. Loke sí nos por hasi ta tuma prekoushon. I si bo nota kualke un di e síntomanan menshoná, dor di e kalor, buska un área ku ta mas fresku òf den sombra pa e kurpa rekuperá. Si e síntoma persistí òf bira intenso, akudí na bo dòkter di kas mas lihé posibel. Laga nos vigilá pa esnan ku ta meresé èkstra kuido manera mucha chikí, hende di edat i esnan enfermo ya komo nan ta sinti e efektonan mas lihé durante di e periodo di kalor eksesivo.

Pa keda bon informá tokante situashon di wer, ‘like’ Meteo su página di facebook Meteorological Department Curaçao. Riba e página por sigui boletinnan i e diferente atvertensianan ku Meteo ta emití. Den kaso nesesario lo emití un boletin spesial pa avisá adelantá momentu ku e kalor por bira eksesivo. Mientrastantu Meteo ta sigui vigilá e wer pa asina yuda protehá bo bida i bo propiedat.