WILLEMSTAD.- Kompra i benta di kas den 2023 lo no ta asina fásil mas, pa e forma kon esaki ta bayendo i tur e kamindanan ku tin di kana. Banda di esaki kas pagabel ta difísil awendia i aki un trabou pa arkitekto i kontratistanan pa por yega na un preis mas pagabel. E tendensia ku lo tin den 2023 pa e ramo di kompra i benta di kas ta loke AVMT ta pidi atenshon pe.

Den entrevista ku EXTRA sr.  Robert Salas presidente di AVMT a bisa ku segun temporada ta pasa,  por  a ripará sierto kosnan ku ta bin mester mehora òf kambio riba e merkado i p’esei ta importante pa alertá e merkado riba dje.

Manera e asuntu di finansiamentu ku ta dura hopi luna promé keda kla, pasobra e komunikashon entre makelar, banko i notario ta dura largu. Esaki segun sr. Salas pasobra tin di kontestá yen pregunta entre otro pa FIU. E ta haña ku e komunikashon aki mester mehorá na fabor di e kliente, pa e proseso kana mas lihé.

E merkado kompleto tin hopi keho di esaki i e ta perhudiká nan tur, segun Robert Salas. Ta nan tur ta sinti e efektonan siendo ku e por bai mas lihé.

Mas aleu el a menshoná preisnan pa kas ku a subi drástikamente. Kasi no por papia mas di kas pagabel. Sr. Salas ta konsiente ku gastunan ta subiendo pero e preisnan ta hopi haltu.

Aki tambe e ta haña ku mester bin ku alternativa den konstrukshon i esei ta tarea pa arkitekto i kontratistanan ku ta kumpli ku nos ROP.

Di AVMT nan tin komunikashon ku e diferente asosiashonnan entre otro kontratista, arkitekto i seguronan i tur aña ta papia pa wak e tendensianan ku ta mira. I esun ku ta e mas prinsipal ta e arkitekto i kontratista, ku mester bin ku e solushon konkreto, pa e merkado, pasobra e ta kumbiní nan tambe.

E finansiamentu no ta birando mas mihó tampoko entre otro ku fondo di garantia ku su reglanan a bira mas stringente i ta mas difísil pa bende un kas. Esun ku ta konstruí tambe ta hañ’é den mas difikultat pa e bende.

Mas aleu sr. Salas a bisa ku tin e parti di IT, kaminda tur kos tin di bai via e sistema inteligente, pa asina fasilitá e kumpradó hasi su ‘Due Dilligence’ pa e tin mihó garantia di loke e ta kumpra.