WILLEMSTAD.- E tarifanan lokal pa produktonan kombustibel, ku e reguladó Bureau Telecommunicatie & Post (BT&P) ta ahustá mensualmente, ta kana samsam ku e fluktuashonnan riba e merkado internashonal di energia.

Gobièrnu lokal, e kompania di energia Curoil i e reguladó BT&P no tin influensia riba e fluktuashonnan akí. Ta ahustá e preisnan a base di proseduranan ku ta fihá for di adelantá i den kua kada instansia tin su mes responsabilidat. Dunando splikashon verídiko i al kaso, e tres instansianan akí ke eliminá e noshon eróneo ku nan por kambia tarifa di forma arbitrario.

E noshon eróneo ku e tres instansianan aki por adaptá e tarifanan di forma arbitrario no ta korekto.

Instrukshon
Ora di regulá preis di kombustibel, e tres instansianan menshoná ta tene nan mes na e Instrukshon Regulashon di Tarifa di Kombustibel (‘Richtlijn Tariefregulering Brandstoffen’) di aña 2011. Eiden tin stipulá kua ta e komponentenan ku ta forma e preisnan pa kombustibel i kon ta ahustá e preisnan akí.

Despues ku BT&P hasi e kalkulashon nesesario i duna su konseho, Konseho di Minister mester duna su aprobashon pa finalmente, tur luna, e Ministerio pa Desaroyo Ekonómiko determiná e tarifanan pa usuario final, definitivamente.

Preis di kompra i márgen Curoil
E ‘preis di kompra’ i e ‘márgen Curoil’ ta dos komponente importante ku ta ahustá periódikamente. E preis di kompra ta loke Curoil ta paga na e suministradó di kombustibel. E montante akí ta dependé di, entre otro, e preisnan riba merkado internashonal.

BT&P ta kontrolá e datonan, ku Curoil ta suministrá tur luna den e kuadro akí, na man di desaroyonan riba merkado internashonal. Despues BT&P ta konsehá gobièrnu enkuanto e preis máksimo pa e diferente produktonan kombustibel. Por lo tanto, e ‘preis di kompra’ ku ta bálido pa un determinado luna, ta basá riba fakturanan di kompra di Curoil di mas o ménos dos luna promé.