WILLEMSTAD.- Kasonan di Coronavirus riba nos isla ta sigui haltu. Di akuerdo ku epidemiólogo dr. Izzy Gerstenbluth, e tendensia di oumento di kasonan lo kontinuá e próksimo dianan.
Ayera tabatin 224 kaso positivo for di 1017 total di tèst ku a ser hasí. Tin 27 kaso di rekuperashon, miéntras ku tin 50 hende interná den hospital. E total di kasonan aktivo ta 1.642.
Ayera tabatin 12 persona ku a keda hospitalisá di kua 2 a keda atmití de inmediato den kuido intensivo. Dos (2) persona a sali for di hospital. Adishonalmente un (1) persona a keda trasladá pa kuido intensivo, i 3 otro persona a sali for di kuido intensivo i a bai kuido general. Pues na e momentu aki tin 50 persona hospitalisá di kua 14 ta den kuido intensivo. Esaki ta inkluí dos persona hospitalisá for di Boneiru di kua un (1) ta den kuido intensivo.
Dr, Gerstenbluth a indiká ku si tin un variante di e vírus di Corona den pais e ta keda transmití mas lihé, si no fren’é. Esaki lo tin konsekuensia ku mester bai na oumentá kapasidat den CMC. P’esei a bini ku medidanan mas fuerte di semi “lockdown”.
E oumento di kasonan tin di aber ku resultado di 1 siman pa 10 dia pasá. E tendensia ku ta mira di oumento di tèstnan riba mil i tambe kasonan riba 200 kaso positivo, lo sigui asina. “Nos tabatin elekshon i ya kaba kasonan tabata haltu. Ta for di e momentu ei mester a bai un “lockdown”, dor ku nos tabatin elekshon, no por a par’e. Awor ta di warda wak e sifranan”.
Mas aleu dr. Gerstenbluth a bisa ku tin pániko serka hende ku nan no ta yega lihé pa hasi tèst. “Tèstmentu no ta pone ku bo ta rekuperá. Si bo tin síntoma por fabor keda paden i warda e dia di bai tèst ku lo dura 2 pa 3 dia ku mèldu. Si tin problema ku halamentu di rosea, yama dòkter di kas pa e evaluá bo”. Mas aleu dr, Gerstenbluth a bisa tin hende ku tin síntoma i ta kere ta algu pasahero pero na e di 4 pa 5 dia, nan por bira hopi malu. Kanando ku e síntoma, ta pegando hopi hende ku e vírus promé ku bo bira malu. Ta p’esei si tin síntoma keda paden.