CARACAS.-Un ratu pasa un página di media na Venezuela/Caracas, a mèldu ku tabatin tenshon na Caracas, rondó di Palasio Presidensial Miraflores.
T’asina ku esnan ku ta biba alrededor a hasi grabashon, kaminda por a skucha tiramentu, i eksploshonnan alrededor di e palasio.
Den un dje grabashonnan por a tende gritu di hende hòmber ku tabata bisa algun hende riba kaya, pa bai nan kas. Tambe tin vários ‘drone’ tabata bula, komo tambe tankinan di guera serka di Miraflores. No ta konosí ken ta manehá e ‘drone’nan, miéntras por mira sòldatnan ta kore den kaya banda dje palasio presidensial. Den e korementu por a mira mucha chiki ku adulto tabata kore riba kaya tambe.
Hopi tabata e pregunta na unda e visepresidente, sra. Delcy Rodriguez, kende den oranan di mainta a keda instalá komo presidente enkargá di Venezuela, pa motibu di ousensia di Nicolás Maduro, tabata. Rodriquez su ofisina ta keda pegá ku Miraflores.
Mas despues tabatin informashon ku tabatin un konfushon, ora ku a lansa algun ‘drone’. Dor di esaki, defensa militar a aktivá mesora den e área. Mas despues e situashon lo a kalma. A resultá ku ta defensa mes a lanta e “drone” nan sin ku nan koleganan tabata na altura. P’esei a start un lòsmentu di bala.