WILLEMSTAD.- Djaluna dia 8 di yüli awor lo bai tin un dia di informashon di Stichting Caribische Belastingwinkel di Ulanda aki na Kòrsou.Ta trata di un dia di informashon pa hóbennan ku ta bai studia na Ulanda i kiko pa nan tene kuenta kuné. E dia atardi di informashon aki ta di mitar di 6 pa mitar di 7 na e ofisina di RK Schoolbestuur na Julianaplein, i EXTRA a papia ku Silvia Monica Semeleer, un di e guiadonan na e fundashon aki.

Yena formulario...

Stichting Caribische Belastingwinkel a lanta dor di inisiativa di Germaine Rekwest aña pasa. Intenshon ta pa bin Kòrsou, Boneiru i Aruba pa yuda e komunidat ku yena formularionan di impuesto. Na Kòrsou por yena esaki online pero e studiantenan ku ta bin ta pa fasilitá e pueblo pa yena e formulario. Na Ulanda ta konosí ku den e siudatnan grandi ya e ta sosodé. Ta simplemente bai e lokalnan i einan hendenan ta bin i haña yudansa ku nan formularionan. Esaki ta yuda komunidat grandemente i e rísiko di hasi un eror ta mas chikitu. Esaki ta netamente di e fundashon, pa no hasié na Ulanda so pero pa e pueblonan aki banda tambe.

Kiko ferwaktu na Ulanda....

E tim lo ta na Kòrsou den wikènt benidero pa un siman, ku sekshonnan di informashon. Sylvia a papia ku nos for di Ulanda i a bisa ku komo studiante di Karibe nan ta haña importante pa duna bek i voral e studiantenan nobo di kiko nan por ferwaktu ora nan bai Ulanda. Kiko ta e diferensia di e bida na Kòrsou òf un di e islanan di eks Antia i e bida na Ulanda. Kiko tene kuenta kuné, kiko regla pa no haña sorpresa ora nan ta na Ulanda. Mihó ta bon informá, segun Silvia ku despues bin Ulanda i haña sorpresa. Esei segun Silvia ta e meta prinsipal ku e dia informativo di djaluna awor 8 di yüli.

Promé bes na Kòrsou....

Esaki ta promé bia ku Stichting Caribische Belastingwinkel ta bin duna e informashon na Kòrsou. Silvia ta spera ku e lo bira un éksito i ku nan por sigui bin Kòrsou pa duna studiantenan e informashonnan nesesario for di aki na Kòrsou. Ta importante pa e studiantenan sa kiko tin pasobra na Ulanda e sistema di belasting ta konosé yen tipo di ‘toeslag’ i ta bon pa nan sa kiko nan tin di bai paga pa e peso ta ménos. Nan ta yama nan e tep i trikinan ku nan por duna pa e bida di e studiante ta mas fásil.

Bon informá....

Silvia a bisa EXTRA ku nan a ripara ku voral e ‘zorgtoeslag’ i ‘huurtoeslag’ ku no tin  na Kòrsou, e studiante ta haña e tep na Kòrsou pa e pidié i e studiante ta hasié pasobra e ta haña plaka bek. Pero despues di algun aña ku gobièrnu bai konta e kosnan manera mester ta, nan ta kobra bu e sèn bek tambe. Ta bon pa e studiante ta bon informá i kon e ta tene e instansianan na altura pa finalmente no bin un resibu pa e studiante tin di paga bek.

E fundashon ta invitá tur hende ku tin pensa di bai Ulanda e aña aki òf den futuro pa buska informashon. Lo ta un informashon kòrtiku di puntonan konkreto. I despues tin chèns di bai sekshonnan personal ku e studiantenan ku lo tei for di Ulanda den e tim i interkambiá di idea pa asina e toke ta mas dirigí riba e preguntanan ku e studiante tin.

Prepará delantá...

Na Ulanda mes tambe segun Silvia, tin Kas di Kòrsou ku ta duna informashon i ta keda na e studiante mes tambe pa aserka e instansianan pa haña ayudo. Tambe ora nan studiante yega Ulanda for di Kòrsou e ta bai kai den un siman di introdukshon. Ounke no mester lubidá ku e studiante na e momentu ei ta nobo nobo na Ulanda i ta keda bombardiá ku informashon i no tur kos ta keda skèrpi den e mente. I p’esei mes e dia di informashon aki na Kòrsou, ku ta sosodé promé ku e studiante bai Ulanda, ya e por prosesá e informashon i pa ora e yega Ulanda i ta den e siman di introdukshon, ta informashonnan ku ta ripití i asina lo por sa mas mihó ora den un situashon kiko pa hasi.

Regla BSN nr ....

Pa e hóbennan ku ta bai studia Ulanda Silvia a bisa EXTRA ku na tin di tene kuenta ku ora yega Ulanda kuminsá ku buska BSN nr. Ta algu ku no ta tene kuenta kuné i e ta strob’e pa kaba di regla hopi kos., E ta kere ku kisas por purba ku for di Kòrsou traha un sita na e gemeente pa buska e number. Abase di e number ei por sigui regla tur kos na Ulanda.

Studiantenan di Erasmus na Kòrsou....

Silvia ta un di e guiadonan di e fundashon. El a kaba di studia i huntu ku 10 studiante di Erasmus univèrsiteit lo bin Kòrsou mas otro guiado. Nan tur tin hopi eksperensia pa yuda e studiantenan ku mester di dje. I banda di e studiantenan ku lo haña informashon, e fundashon lo tei un siman na campus di UoC kaminda lo duna asistensia na tur ku tin mester di esaki.