WILLEMSTAD.- Abitantenan di Mundu Nobo ta rabiá. Nan no por komprondé kon un tereno ku ta keda hòrtá ta bira legal djis pasobra invershon a keda hasí riba e tereno ei. “Anto nos tur por kue tereno numa”, asina tabata nan reakshon na EXTRA.

E abitantenan a tuma nota di reakshon di minister Zita Jesus-Leito relashoná ku e empresario ku a traha kos riba tereno di gobièrnu kual e no tabatin pèrmit pe. E empresario aki a traha tambe den nan área den hanchi Polar, tapando tur nan bista i kousando molèster.

Segun nan a splika EXTRA ora nan a nota konstrukshon tumando lugá nan a manda un karta pa DROV. Nan a haña komo kontesta di DROV ku e konstrukshon ei ta ilegal i e mester para mesora.

Pero no a dura ni un siman ku e konstrukshon a kontinuá. E abitantenan a bolbe manda un karta pa DROV pero e biaha aki nan no a haña kontesta nunka mas.

Nan ta puntra i nan tin e fuerte impreshon ku e minister enkargá ku DROV a “overrule” e desishon di hefe di DROV i a hasi un tereno hòrtá legal djis pasobra e empresario tin invershon hasí eiriba kaba.

Asta nan a tende e minister bisa ku el a informá 4 otro minister di e desishon ei. Esaki ta trese kuné ku si e 4 ministernan ei a bai di akuerdo ku un kos ilegal, nan tambe ta bira kómplise di hòrtamentu di tereno.

E abitantenan ke sa unda nan derechi a keda. A tene kuenta ku nan kas, e kasnan di polis aki ta praktikamente monumentonan. A tene kuenta ku a tapa nan bista i kita nan trankilidat.

Nan ta haña ku un akto asina aki ta kastigabel i mester hasi denunsia na ministerio públiko. Nan mes probablemente lo bai kuminsá un akshon pa denunsia e minister ku a kometé e ilegalidat aki.

I si resultá ku ta esei ta e maneho ku gobièrnu/minister ta hibando, ta nifiká ku ken ku a por kue pida tereno, invertí riba dje i e ta bira outomátikamente legal!