“Safe sex” no ta biba den komunidat kompletamente na satisfakshon

WILLEMSTAD. - Konforme un  análisis  di Famia Planiá pa loke ta trata sifra di embaraso bou di hóbennan por opservá ku ounke ku e sifranan ta bahando den sierto sentido, tòg tin ku keda informá hóbennan pa nan protehá nan kurpa.

Famia Planiá ta splika ku revisando sifranan optené di registro sivil di nasementu, añadí ku dato kompilá pa CBS, Famia Planiá por yega na algun konklushon tokante e fenómeno embaraso hubenil na Kòrsou.

Pa e análisis por ta kompletu te ku 2020, Famia Planiá ta falta den e sifranan total, e repartishon den kategoria di edat. Famia Planiá no ta disponé di un repartishon den kategoria di edat di mama pa e añanan 2018 pa 2020.

Pa loke ta trata sifranan te ku 2017 ku si ta repartí den kategoria di edat di bou di 14 aña i e edatnan di 15 pa 19 aña (manera indiká den e tabèl aki bou) por mustra un bahada  den kantidat di mama hóben di 16 aña i ménos, for di 2011 te ku 2017 ku mas ku 50%.

Pa loke ta sifranan total pa aña, e total aki ta bahando ku algu ménos ku 50% den e añanan 2016 pa 2019 kompará ku añanan anterior di 2011 pa 2015.

Pa loke ta trata e sifranan total di mama hóben (edat te ku 19 aña) pa aña, por nota ku for di 2016 esakinan a keda fluktua entre 114 pa 117 mama hóben pa aña. Akinan tambe por bisa ku e porsentahe di mama hóben den e sifranan total di nasementu ta bahando i no ta representá mas ku 7,4% di e total di bebi ku ta nase pa aña. Esaki den e añanan anterior 2011 esaki tabata 10.1% i a keda baha poko poko te 6.5% den 2016.

Pa Famia Plania esaki ta un indikashon ku e mensahe ta yegando si na e hóbennan ku ta opta pa no sali na estado na un edat muchu yòn ku tur e konsekuensianan ku esaki por trese kuné pa nan mes i nan famia.

Esaki por konsiderá komo un fenómeno positivo si den komunidat. Di otro banda no por pèrdè na bista, ku e komportashon di tene relashon safe “safe sex” no biba den nos komunidat kompletamente na satisfakshon.

Hopi biaha ta tende ku hóbennan aktualmente tin hopi fasilidat na hasi aborto. Famia Planiá ta na altura di uso di métodonan kasero pero tambe formanan ofisial  via médikonan ta tuma lugá ku basta regularidat na diferente entidatnan médiko na Kòrsou.  Algu ku den e mundu di awendia no mester ta e rekurso mas indiká, si Famia Planiá por brinda tur sorto di método antikonseptivo pa evitá salimentu na estado.

Famia Planiá tei pa yuda nos poblashon pa hasi un planifikashon familiar na e momentu indiká pa kada famia. Terminashon di un embaraso ta tuma lugá na un eskala basta alarmante si referí na datonan  akumulá den un forma no ofisial. Aborto ta un forma no ofisial di planifikashon familiar den komunidat ku Famia Planiá no ta boga pe i sigur no bou di e sirkunstansianan bou di kua esaki hopi biaha ta tumando lugá.

Famia Plania no kier kondená ni propagá aborto tampoko teniendo na kuenta ku e derecho di eskoho ta algu ku mester ser respetá.

Estudionan hasí pa dr. Boersma ku ta data  di 2008-2009 a yega di duna un indikashon sientífiko di e embergadura di esaki. Den su análisis e la kalkulá den e tempu ei, ku e total di 40% di e abortonan tabata bou di e kategoria di 15-19 aña.

Esaki ta representá un total di 321 aborto. Segun dr. Boersma e motibu mas prinsipal ta ku no ta apliká e formanan mas konfiabel di antikonseptivo.