WILLEMSTAD.- Ayera, a dal un paso importante pa yega na pago di saldo di e depositantenan di Girobank N.V. i terminashon kontrolá di e instituto akí su operashonnan.
Den kolaborashon ku gobièrnu, CBCS a formulá un solushon i a pone esaki por eskrito den un akuerdo ku a keda firmá ayera pa CBCS, Pais Kòrsou i un kompania nobo ku Pais a establesé bou di e nòmber di GI-RO Settlement Holding N.V.
GI-RO Settlement Holding N.V. lo ta dediká spesífikamente na manehá i kobra e fiansanan pendiente di Girobank N.V. i usa e entradanan akí pa hasi pago na e depositantenan di Girobank
N.V. Pa GI-RO Settlement Holding N.V. por disponé di e fiansanan akí, mester risibí pèrmit di Korte.
Dia 18 di desèmber 2020, Hulanda a deklará su mes dispuesto di hasi un fiansa kondishonal na Kòrsou pa finansiá e terminashon kontrolá di e operashonnan di Girobank N.V. Unabes Korte
duna e pèrmit en kuestion, Hulanda lo pone e fondonan na disposishon di GI-RO Settlement Holding N.V., ku Pais aktuando komo intermediario. Ku e fondonan akí, GI-RO Settlement Holding N.V. lo por paga e depositantenan di Girobank N.V. nan saldo mas lihé. Manera ta premirá, ta ku e fondonan akí lo pagá saldo kompleto di gran mayoria di e mas ku 2000 depositantenan ku tin sèn ainda riba un kuenta ku ta ser afektá pa e moratorio. Pa algun desena di depositante so esei lo no ta e kaso.
Na promé lugá, GI-RO Settlement Holding N.V. lo usa e ingresonan ku e lo optené ku maneho i kobransa di e fiansanan di Girobank pa paga e fiansa di Hulanda bèk. Despues, si resta sufisiente fondo, GI-RO Settlement Holding N.V. lo hasi pago na e sobrá depositantenan tambe.
Manera a anunsiá anteriormente, terminashon di e operashonnan di Girobank ta andando.
Gradualmente, lo sera e sukursalnan di Girobank i lo saka e ATM nan for di servisio, aunke semper lo anunsiá sufisiente tempu di antemano ora esei ta bai sosodé. Ta tene debido kuenta ku e depositantenan ku no tin un kuenta na un otro banko komersial.
Ta rekomendá tur depositante
di Girobank pa habri un kuenta na otro banko. Ademas, ta preparando un plan di redundansia pa personal di Girobank.
Na kuminsamentu di otro aña, e depositantenan di Girobank lo risibí un karta ku mas detaye tokante e pago i prosesamentu atministrativo di nan kuentanan. Esnan ku tin fiansa pendiente lo tin ku sigui kumpli ku nan pagonan di interes i kapital manera kustumber. Si tin kualke kambio relashoná ku esaki, lo pone e fiadónan na altura na tempu.
E preguntanan mas frekuente i nan kontestanan ta disponibel riba wèpsait di CBCS i di Girobank
N.V. Pa otro pregunta, kontaktá Girobank N.V. su helpdesk na telefòn libremente.
E siman akí, e helpdesk lo ta disponibel di djaluna pa djabièrnè, di 9.00 a.m. pa 4.00 p.m. na +5999 4339130. Otro aña, e helpdesk lo ta habrí riba dia di trabou, di 9.00 a.m. pa 4.00 p.m. Tambe por manda
pregunta via e-mail na giro@centralbank.cw.