WILLEMSTAD.- E lei “alcoholblas” ainda no ta kla, miéntras ta hasi e tèst riba kaya serka outomobilistanan. Minister Quincy Girigorie a splika ku a traha un landsbesluit ku a pasa su ronda di konseho. A bin algun punto di remarke ku mester a keda adaptá di parti ministerio di hustisia a kaba su parti. Awor e landsbesluit ta bai ministerio di VVRP ku ta responsabel pa kareteranan. Seguridat den tráfiko ta un kolaborashon ku hustisia i VVRP. VVVRP mester duna su “input” pa despues bai Raad van Advies pa por duna su konseho i asina e landsbesluit por keda formalisá.

Durante e periodo Ministerio Públiko a sigui traha pa yega na modalidat pa hues por rekonosé e lei.

Minister a splika ku hues a rekonosé e forma kon a “stel op” e alkoholblas aki, i forma kon a us’é komo prueba pa loke ta trata kaso di alkohòl den tráfiko. Hues a aprobá e uso di e tèst aki. Ainda lo tin un kaso den korte di apelashon ku minister ta wardando su resultado.

E mandatario a bisa di ta kontentu ku hues a akordá e forma di funshoná di e tèst. Pasobra semper komo Ministerio Públiko i gobièrnu ta ankra e punto aki den e lei, semper ta tene kuenta kon hues ta mir’é.

E echo ku hues a duna lus bèrdè pa e forma kon ta hasi  tèst, ta pone ku e koperashon entre ministerio di hustisia i usa e resultado di e tèst di blas aki komo prueba, ta sigui kana e kaminda pa por usa e mashin di blas den tráfiko, sperando ku e lei ta kla.

E liña ku hues a duna ku por us’e komo prueba den un kaso, e echo ku hues a duna bisto bueno pa uso di e tèst aki, a habri un kaminda wardando e legalidat i por sigui us’é tòg.

Un hende no por nenga durante di kontròl di no ke hasi e tèst di blas alkohòl.

Dia 14 di sèptèmber 2018 pa promé biaha ministerio públiko a usa e aparato pa   kontròl den tráfiko. Ta trata di e asina yamá "ademanalyseapparaat". Esaki ta indiká eksaktamente kuantu alkohòl e shofùr a bebe.