WILLEMSTAD – Gerensia di The Ritz Residence a reakshoná riba e publikashon di derechi di ‘retentie’ ku e kompania di konstrukshon Lendering Bove Constructie BV (LB Construction BV) a imponé awe riba nan kuater edifisio nan manera EXTRA a informá kaba anteriormente. Segun nan splikashon LB Constructie durante e periodo di konstrukshon a kometa vários fayo ku a kousa un tardansa enorme di konstrukshon.  Den e kontrakt lo tin un klóusula pa un but si a kaso entrega e trabounan kaba ku retraso. E suma aki ya a akumulá bira kasi 290 mil florin. LB Constructie ta ninga di kumpli ku e pago aki òf pone un seguransa pa esaki. komo konsekuensia di esaki The Ritz a tuma pasonan legal i na mes momentu stòp tur pago komo garantia pa nan demanda riba LB.

Segun e gerente Hans Robben, e tin e obligashon na su klientenan pa e apartamentunan ta di kalidat ora keda entrega. “Si esaki no ta sufisiente bon mester hasi esaki di nobo i esaki ta tuma tempu. E motibu di e tardansa ta sinta serka LB mes i awor mester sinta riba e blarnan. Pa ehersé e derechi  di ‘retentie’ ta simplemente un demonstrashon di poder pero esaki no ta eliminá e orígen di e problema ku ta e falta di kalidat.”